Տոկիո-2020. Արմեն Մելիքյանը կպայքարի բրոնզե մեդալի համար

Ճապոնիայի մայրաքաղաք Տոկիոյում ընթացող 32-րդ ամառային օլիմպիական խաղերի ըմբշամարտի մրցաշարում Հայաստանը ներկայացնող հունահռոմեական ոճի ըմբիշ Արմեն Մելիքյանը պարտվեց հունահռոմեականների մրցաշարի 60 կգ քաշային կարգի երկրորդ գոտեմարտում:

Նա չկարողացավ հաղթել ուկրաինացի Լենուր Տիմուրովին ու պարտվեց 4:8 հաշվով:

Եթե Տիմուրովը եզրափակիչի ուղեգիր նվաճի, հայ ըմբիշը բրոնզե մեդալի համար պայքարելու հնարավորություն կստանա: Կիսաեզրափակիչում ուկրաինացին մրցելու է աշխարհի կրկնակի չեմպիոն, ճապոնացի Կենիչիրո Ֆումիտայի հետ:

2019թ. մինչև 23 տարեկանների աշխարհի չեմպիոն Արմեն Մելիքյանը 1/8 եզրափակիչում հաղթել էր իրանցի Ալի Ռեզա Նեջաթիին։

Տոկիո-2020-ի հունահռոմեական ոճի ըմբշամարտի մրցաշարում Հայաստանը կներկայացնեն նաև Կարեն Ասլանյանը (67 կգ), Կարապետ Չալյանը (77 կգ) և գործող օլիմպիական չեմպիոն Արթուր Ալեքսանյանը (97 կգ): Չալյանն ու Ալեքսանյանը պայքարի մեջ կմտնեն օգոստոսի 2-ին, Ասլանյանը՝ օգոստոսի 3-ին:

Ազատ ոճի ըմբշամարտի մրցաշարում Հայաստանի մասնակիցներն են Արսեն Հարությունյանը (57 կգ) և Վազգեն Թևանյանը (65 կգ):

Այս մասին տեղեկանում ենք  Sputnik Armenia-ի կայքից։