Իրանում շարունակվում են խմելու և ոռոգման ջրի բացակայության պատճառով ցույցերը․ իրավապահների և ցուցարարների միջև բախումների հետևանքով կան զոհեր և վիրավորներ (լուսանկարներ)

Իրանում խմելու և ոռոգման ջրի բացակայության պատճառով հուլիսի 15-ից հարավարևմտյան Խուզեսթան նահանգում մեկնարկած և մինչ օրս երկրի տարբեր հատվածներում տեղի ունեցող ցույցերը սաստկանում են։

Ինչպես մի շարք իրավապաշտպան կազմակերպություններին հղումով գրում է CNN-ը, իրավապահների և ցուցարարների միջև բախումների ընթացքում զոհերի թիվը կարող է հասնել 10-ի, բազմաթիվ մարդիկ լուրջ վնասվածքներ ունեն։

Ընդ որում, Իրավապաշտպանների լրատվական գործակալության (HRANA) տվյալներով՝ վերջին 10 գիշերների ընթացքում Իրանի 30 քաղաքներում և շրջաններում առնվազն 102 մարդ է ձերբակալվել։

Հարկ է նշել, որ խմելու և ոռոգման ջրի բացակայության պատճառով մեկնարկած ցույցերը որոշ շրջաններում նոր երանգ են ստացել՝ վերածվելով կառավարության հրաժարականի և երկրի գերագույն առաջնորդի դեմ ցույցերի։

Նշենք, որ Իրանում երաշտը, որը վերջին կես դարում ամենաաղետաբերն է, անդրադարձել է տնային տնտեսությունների, գյուղատնտեսության, անասնապահության վրա։