ԱՄՆ-ում անտառային հրդեհների մակերեսը հասել է գրեթե 600 000 հեկտարի. AP

ԱՄՆ-ում հրշեջները շարունակում են պայքարը բնական հրդեհների դեմ երկրի արևմուտքում, որտեղ կրակով է բռնված գրեթե 600 հազար հեկտար տարածք: Ինչպես հուլիսի 22-ին հաղորդել է Associated Press գործակալությունը, այժմ արտակարգ ծառայություների օգտին են գործում եղանակի փոփոխությունը և քամու ուղղությունները, տեղեկացնում է «Արմենպրես»-ը:

Այժմ ԱՄՆ-ում բնկված հրդեհներից խոշորագույնն Օրեգոնի նահանգում է: Ինչպես նշում է AP-ն, այն հարավ - արևելյան ուղղությամբ մոտենում է բռնկման անցյալ օջախներից մեկի սահմաններին: Իշխանությունները հույս ունեն, որ խանձված հողը, որտեղ գործնականում բնափայտ չի մնացել, կարող է փոքր-ինչ նվազեցնել կրակի տարածման տեմպերը, որն այժմ աճում է օրական շուրջ 6 կիլոմետր արագությամբ:

Այժմ Օրեգոնի տարածքում, որտեղ կա, ընդհանուր առմամբ, 7 անտառային հրդեհ, կրակով է բռնված ավելի քան 200 հազար հեկտար հող: Մասնագետների գնահատումներով՝ նախքան հրշեջներին կհաջողվի մեկուսացնել դրանցից ամենախոշորը, կարող է այրվել մինչև 40 հազար հեկտար: Բացի Օրեգոնից, բնական հրդեհներ են վառվում նաև երկրի արևմուտքի այլ նահանգներում: Այսպես, Ազգային միջգերատեսչական հրշեջ կենտրոնի տվյալներով՝ բռնկման 17 օջախներ են արձանագրվել Մոնտանայում, 16-ն՝ Այդահոյում: Ութ հրդեհ է մոլեգնում Կալիֆոռնիայում, որտեղ կրակով է բռնված ավելի քան 93 հազար հեկտար հող: Ընդհանուր առմամբ ԱՄՆ-ի արևմտյան նահանգներում այժմ արձանագրված է 79 խոշոր հրդեհ, հայտնել է Ազգային միջգերատեսչական հրշեջ կենտրոնը: Կրակով է բռնված 586 հազար հեկտար հող: