ԱՄՆ-ն լրացուցիչ պատժամիջոցներով է սպառնացել Թուրքիային, եթե երկիրը շարունակի ռուսական ռազմատեխնիկա ձեռք բերել

Թուրքիայի կողմից ռուսական զենքի և ռազմատեխնիկայի գնումների շարունակումը կհանգեցնի ԱՄՆ-ի լրացուցիչ պատժամիջոցներին: Ինչպես գրում է ՏԱՍՍ գործակալությունը, այդ մասին հայտարարել է ԱՄՆ պետքարտուղարի տեղակալ Վիկտորյա Նուլանդը:

«Մենք շարունակում ենք առարկել Թուրքիայի կողմից ռուսական С-400 հակաօդային պաշտպանության համակարգերի գնման և տեղակայման դեմ: Եվ հստակ հասկացնել ենք տվել, որ Ռուսաստանից ցանկացած նոր խոշոր սպառազինություն գնելու դեպքում լրացուցիչ պատժամիջոցներ են նախատեսվում՝ ամերիկյան CAATSA օրենքի համաձայն», - ասել է ԱՄՆ պետքարտուղարի տեղակալը` ելույթ ունենալով ԱՄՆ Սենատի արտաքին հարաբերությունների հանձնաժողովում կայացած լսումների ժամանակ:

«Վաշինգտոնի վաճառքներն Անկարային և Թուրքիայի հետ հինգերորդ սերնդի F-35 կործանիչ-ռմբակոծիչների համատեղ արտադրությունը դեռ կասեցված կմնա», - հավելել է Նուլանդը:

CAATSA-ն (Countering America’s Adversaries Through Sanctions Act) «Պատժամիջոցների միջոցով Ամերիկայի հակառակորդներին հակազդելու մասին» օրենքն է, որն ընդունվել է ԱՄՆ-ում 2017 թվականին: Այս նորմատիվ իրավական ակտը սպառնում է միակողմանի ամերիկյան սահմանափակումներ կիրառել այն պետությունների նկատմամբ, որոնք Ռուսաստանից սպառազինության և ռազմական տեխնիկայի ժամանակակից խոշոր համակարգեր են ձեռք բերում:

Նուլանդը հայտնել է, որ ԱՄՆ-ն առաջարկել է և կշարունակի առաջարկել Թուրքիային տարբեր ելքեր իրավիճակից: Նա ասել է, որ իրեն, ինչպես ամերիկյան վարչակազմում շատերին, անհասկանալի է՝ «ինչո՞ւ է ՆԱՏՕ-ի դաշնակիցը ցանկանում ձեռք բերել ռուսական համակարգեր»: