Ֆրանսիայում կարող են նորից պարետային ժամ մտցնել կորոնավիրուսի պատճառով

Ֆրանսիայի իշխանությունները չեն բացառում, որ առաջիկայում որոշ շրջաններում կմտցվեն սահմանափակումներ, այդ թվում պարետային ժամ՝ կորոնավիրուսի տարածման տեմպերի ավելացման հետ կապված։ Այս մասին երկուշաբթի հայտարարել է Ֆրանսիայի ԱԳՆ-ին կից պետքարտուղար Քլեման Բոնը BFM հեռուստաալիքի եթերում։

«Դա հնարավոր է»,- նշել է նա՝ պատասխանելով համապատասխան հարցին։ Նրա խոսքով՝ երկրի նախագահ Էմանուել Մակրոնը հուլիսի 12-ի հեռուստատեսային դիմումում նշել է, որ կարանտինային սահմանափակումներ մտցնելու իրավունքներ կունենան ֆրանսիական մարզերի պրեֆեկտները։ «Միջոցները պետք է համապատասխանեն իրավիճակի ծանրությանը»,- ընդգծել է պետքարտուղարը, տեղեկացնում է ՏԱՍՍ-ը։

«Համաճարակը հաղթահարելու միակ հնարավորությունը պատվաստումն է»,- հիշեցրել է նա։

Հուլիսի 18-ին հանրապետության առողջապահության նախարարությունը տեղեկացրել է, որ մեկ օրում Ֆրանսիայում հայտնաբերվել է կորոնավիրուսով վարակման ավելի քան 12 հազար նոր դեպք։ Ինչպես նշում են փորձագետները, այդ ցուցանիշը վկայում է երկրում համաճարակի նոր բռնկման մասին։

Համաձայն իշխանությունների վերջին տվյալների՝ համավարակի սկզբից Ֆրանսիայում գրանցվել է կորոնավիրուսով վարակման ավելի քան 5,8 մլն դեպք։ Դրա զոհ է դարձել ավելի քան 111 հազար մարդ։ Հանրապետության առողջապահության նախարարության տեղեկությամբ՝ պատվաստանյութի առաջին չափաբաժինը ստացել է ավելի քան 36 մլն մարդ։