Գերմանիան և Բելգիան պատուհասած ջրհեղեղների զոհերի թիվը գերազանցել է 150-ը. անհետ կորածների որոնումը շարունակվում է (լուսանկարներ)

Գերմանիայի արևմուտքում և Բելգիայում մոլեգնող ջրհեղեղների զոհերի թիվը գերազանցել է 150-ը, արտակարգ իրավիճակների ծառայությունները շարունակում են անհետ կորածների որոնման աշխատանքները, հայտնում է The Guardian-ը:

Գերմանիայի նախագահ Ֆրանկ Վալտեր Շտայնմայերը նշել է, որ «ապշած է հեղեղների առաջացրած ավերածության մասշտաբներից»` կոչ անելով «ամեն կերպ օգնել ու աջակցել զոհերի ընտանիքներին և տուժածներին»:

Մինչդեռ երկրի կանցլեր Անգելա Մերկելն ասել է, որ կառավարությունը տուժածներին «միայնակ չի թողնի իրենց տառապանքների հետ»` ավելացնելով, որ «ամեն ինչ անում է, որ օգնի նեղության մեջ գտնվողներին»:

Գերմանիայի Ռեյնլանդ-Պֆալցինա նահանգի իշխանությունները շաբաթ առավոտյան հայտնել են, որ այնտեղ 93 մարդ է զոհվել, իսկ հարևան Հյուսիսային Ռեյն-Վեստֆալիա նահանգում զոհերի թիվը 43-ն է: Պաշտոնյաները նախազգուշացրել են, որ զոհերի թիվը կարող է աճել: Ռեյնլանդ-Պֆալցիայի Ահրվեյլեր շրջանում շուրջ 1300 մարդ մնում է անհայտ կորած:

Ավելի վաղ հաղորդվել էր, որ Գերմանիայի պաշտպանության նախարարությունը ջրհեղեղի պատճառով երկրի արևմուտքում ռազմական աղետի ռեժիմ է հայտարարել, ինչի մասին Բեռլինում կայացած ճեպազրույցում ասել է գերատեսչության ներկայացուցիչը:

Գերմանիայում տեղատարափ անձրևները շարունակվում են երկուշաբթիից, դրանք առաջացրել է Եվրոպայի «Արևմուտքում» հաստատված «Բերնդ» ցիկլոնը: Եղանակի հիմնական հարվածը հասցվել է Գերմանիայի արևմտյան և հարավ-արևմտյան շրջաններին, որտեղ գետերը, ներառյալ Հռենոսը, դուրս են եկել ափերից և հեղեղել փողոցները:

Ինչ վերաբերում է Բելգիային, ապա այստեղ զոհերի թիվը հասել է 20-ի, անհայտ կորածները ևս 20-ն են: Մահացածների մեծ մասը հայտնաբերվել է Լիեժի շրջակայքում:

Պարբերականը գրում է, որ Շվեյցարիան, Լյուքսեմբուրգն ու Նիդեռլանդները ևս տուժել են ջրհեղեղներից: