Ինքնիշխանության և պետության մասին մտածող ղեկավարը մանր հաշվեհարդարով, վրեժի ծարավը հագեցնելով, ընդդիմությանը պատժելով չէր զբաղվի և չէր ընկնի իր դեմ դուրս եկածների հետևից. «Հրապարակ»

«Հրապարակ» թերթը գրում է.

«Երբ տարբեր տեղեկություններ համադրում ես, ակնհայտ է դառնում, որ նոր զարգացումները մեր տարածաշրջանում երկար չեն սպասեցնի։ Մի կողմից՝ Նիկոլ Փաշինյանը կարծես ինչ-որ տեղ է շտապում՝ օրական մի քանի հանդիպում ունենալով տարբեր անձանց հետ, հաղորդագրություններ տարածելով և աշխատանքի իմիտացիա ստեղծելով։

Մյուս կողմից՝ օտար պետությունների կողմից էլ հետաքրքրության աճ կա․ դեսպաններ են այցելում Փաշինյանին, դրսից ենք հյուրեր ունենում, տարբեր մակարդակի բարձրաստիճան պաշտոնյաների հետ հեռախոսային շփումներ։ Եվ երրորդ ցուցիչն ադրբեջանական կողմի նկատելի ակտիվացումն է․ սադրիչ ու ռազմատենչ հայտարարություններ Ադրբեջանի նախագահի կողմից, թե՝ Զանգեզուրը մերն է, Ադրբեջանի պաշտպանության նախարարության կողմից, թե՝ հայերը կրակում են։ Ադրբեջանի ակտիվ քայլերը՝ գրաված տարածքներում ներդրումներ ապահովելու, Շուշի այցելություններ կազմակերպելու, թուրք-ադրբեջանական մեծադղորդ ծրագրերի ու դրանց մասին հռչակագրեր ընդունելու հետ կապված։

Եվ երբ այս խայտաբղետ տեղեկատվության հետ համադրում ես Սյունիքում ծավալվող իրադարձությունները և Սյունիքի համայնքապետերի հանդեպ Հայաստանի իշխանությունների ձեռնարկած բարբարոս հաշվեհարդարը, հասկանում ես, որ իրադարձությունների զարգացումը հօգուտ մեր պետության, հօգուտ մեր ազգի ու մեր պետականության գոյատևման չի ընթանում, որքան էլ որ վարչապետ Փաշինյանն իր խոսքում հերթական «լապշան կախի մեր ականջներից», թե պաշտպանելու ենք մեր ինքնիշխանությունը։ Ինքնիշխանության և պետության մասին մտածող ղեկավարը մանր հաշվեհարդարով, վրեժի ծարավը հագեցնելով, ընդդիմությանը պատժելով չէր զբաղվի և չէր ընկնի իր դեմ դուրս եկած համայնքապետերի հետևից։ Դա ո՛չ նորմալ մարդուն է վայել, ո՛չ տղամարդուն»,-գրում է թերթը։

Նյութն ամբողջությամբ կարդացեք թերթի այսօրվա համարում։