Ուրախ ենք հաջորդ փուլ դուրս գալու համար․ Մարիբորի մարզիչ

Կոնֆերենցիաների լիգայի որակավորման առաջին փուլի պատասխան խաղում «Ուրարտուն» սեփական մարզադաշտում ընդունել էր սլովենական «Մարիբորին» ու նվազագույն հաշվով պարտություն կրեց։ Դիմակայության ընդհանուր 0-2 հաշվով պարտությամբ մեր թիմը դուրս մնաց հետագա պայքարից։

«Մարիբորի» գլխավոր մարզիչ Սիմոն Ռոզմանը խաղից հետո ասաց հետևյալը․

«Շնորհակալ եմ իմ խաղացողներին ու մեր երկրպագուներին, որոնք երկար ճանապարհ էին անցել մեր այս խաղի համար։ Ուզում եմ շնորհավորել նաև մրցակցին․ կարծում եմ՝ իսկապես լավ խաղ ստացվեց։ Մրցաշրջանի սկզբի խաղերը միշտ բարդ են լինում, բայց թե՛ այստեղ, թե՛ մեր հարկի տակ լավ ֆուտբոլ տեսանք։ Ինչպես ասել էի նախախաղային ասուլիսին՝ իսկապես բարդ խաղ էր և ուրախ ենք հաջորդ փուլ դուրս գալու համար։ Առաջին խաղում կարողացանք գոլ խփել ու բաց չթողնել, ինչն այսօր շատ օգնեց։

Ակումբը մեծ փորձ ունի, բայց թիմը՝ ոչ։ Մեր թիմը համալրված է երիտասարդ ֆուտբոլիստներով։ Այո՛, թիմը երիտասարդ է, բայց ակումբը գիտի՝ ինչ վարքագիծ դրսևորել Եվրոպայում»։