Իրանում ներկայացվել է ծանոթությունների համար երկրում միակ թույլատրելի հավելվածը
![](/timthumb.php?src=disc/14-07-21/c14622f36b3820732fe68ed68419848f.jpg&w=450)
Իրանի իշխանությունները ներկայացրել են ծանոթությունների համար երկրում միակ թույլատրելի հավելվածը՝ «Համդան»-ը, հայտնում է BBC լրատվականը և հավելում, որ այն ստեղծվել է իսլամական քարոզչական կազմակերպության կողմից։
Հավելվածի օգնությամբ Իրանի քաղաքացիները կկարողանան կին կամ ամուսին գտնել, սակայն զույգի միջև համատեղելիության առկայության դեպքում, ամուսնությունից հետո նրանք 4 տարի լինելու են խորհրդատուի «հովանավորչության» ներքո։
Այսպիսով՝ Իրանում ծանոթությունների միակ հասանելի առցանց հարթակը կլինի «Համդան»-ը, քանի որ ծանոթությունների այլ կայքեր այստեղ արգելված են։ Կայքից օգտվելու համար պետք է հաստատվի օգտատերերի ինքնությունն ու նրանք հոգեբանական թեստ պետք է անցնեն, որից հետո կարող են զուգընկեր փնտրել։
Լրատվականը նշել է, որ Իրանում ամուսնալուծությունների թիվն աճել է․ 2008 թվականին 8 ամուսնության դիմաց գրանցվում էր 1 ամուսնալուծություն, իսկ 2020 թվականին գրանցվել է 307 300 ամուսնություն և 99 600 ամուսնալուծություն։ Բացի այդ՝ երկրում նվազել է նաև ծնելիության մակարդակը:
Ավելի վաղ կառավարությունը նշել էր, որ քայլեր չձեռնարկելու դեպքում Իրանը կարող է դառնալ ամենատարեց երկրներից մեկը։ Այս պահին Իրանի բնակչության կեսը մինչև 35 տարեկաններն են, ինչը կարող է փոխվել։