Գիտնականները բացատրել են՝ ինչու են մարդիկ ամենուր տեսնում մարդկային դեմքեր
Ավստրալացի գիտնականները կարողացել են բացատրել տեսողական պատրանքի ֆենոմենը, որի դեպքում մարդիկ տեսնում են դեմքեր, մարդկային ֆիգուրներ եւ կենդանիներ այնտեղ, որտեղ դրանք չկան: Հետազոտությունը հրապարակվել է Proceedings of the Royal Society գիտական պարբերականում:
Ավստրալիայի Սիդնեյի համալսարանից նեյրոկենսաբանները պարզել են, որ դեմքերի պատկերների վերլուծության եւ մշակման դեպքում ուղեղում սկսվում են նույն գործընթացները, որոնք իրական մարդկանց դեմքերի վերլուծության ժամանակ են գործարկվում:
«Էվոլյուցիայի տեսանկյունից, այն առավելությունները, որոնք մենք ստանում ենք, երբեք բաց չթողնելով շրջակա միջավայրում մարդկային դեմքի ներկայությունը, շատ ավելի գերակշռում է սխալների հետեւանքները, երբ ինչ-որ անշունչ առարկաները մենք ընկալում ենք՝ որպես դեմք,-պարզաբանել է առաջատար գիտնականը:-Այդ բարդ սխեմայում կարող են տեղավորվել բազմաթիվ բաներ, ինչը եւ հրահրում է ուղեղում հատուկ նեյրոնային մեխանիզմ, որն ուղղված է դեմքերն արագորեն ճանաչելուն»:
Գիտնականների խոսքով՝ այդ մեխանիզմն ուղեղում գործարկվում է մի քանի միլիվայրկյանի ընթացքում:
Հետազոտողները եկել են եզրահանգման, որ այդ ֆենոմենը մարդու գոյատեւման բնազդի մաս է, որն օգնում է մեզ արագորեն պարզել՝ մեր առջեւ բարեկա՞մ է, թե՞ թշնամի: