Ամառային հանգստի արժեքը. որքա՞ն գումար է անհրաժեշտ ամառային հանգստի համար երկրի ներսում և երկրից դուրս. «168 ժամ»

«168 ժամ» թերթը գրում է.

«Որքա՞ն գումար է անհրաժեշտ ամառային հանգստի համար, եթե հանգիստդ որոշել ես կազմակերպել Հայաստանում, հարևան Վրաստանում, Եգիպտոսում կամ եվրոպական ինչ-որ երկրում. 168.am-ը փոքրիկ հարցախույզ է իրականացրել՝ ծանոթանալով զբոսաշրջային ընկերությունների, հյուրատների և հյուրանոցների առաջարկներին:

«Երկու անձի համար նախատեսված քոթեջի արժեքը օրական 30.000 դրամ է. միայն նախաճաշով»,- սա Ծաղկաձորի հյուրատներից մեկի առաջարկն է:

Ծաղկաձորում հյուրանոցային 1 օրը մեկ անձի համար կարժենա նվազագույնը 33.000 դրամ՝ ստանդարտ համարի դեպքում, կրկին միայն նախաճաշով, ընթրիքի դեպքում՝ կավելանա 4000 դրամ:

Այստեղ, սակայն, կան նաև մատչելի հյուրատներ, որոնք առաջարկում են երկտեղանոց համարներ՝ սկսած 15.000-18.000 դրամից՝ նախաճաշի դեպքում, 3000-ական դրամ էլ կկազմեն ճաշը և ընթրիքը:

Սևանում 1 օրը միջինում կարժենա 40.000 դրամ՝ երկու անձի համար նախաճաշով ստանդարտ համարում, ավելի թանկ համարները՝ 50-80.000 դրամի միջակայքում են:

«Սուպերիոր դելյուքսի արժեքը հուլիս ամսին կկազմի 70.000 դրամ՝ միայն նախաճաշով, սուպերիոր ստանդարտը՝ 55.000 դրամ»,- փոխանցեց հյուրանոցի աշխատակցուհին:

Ի դեպ, եթե գիշերակացին և նախաճաշին գումարենք ճաշի և ընթրիքի գումարները, օրական պետք է նախատեսել առնվազն 50.000 դրամ. 7 օրվա պարագայում այս գումարը կկազմի շուրջ 350.000 դրամ: Ինչ խոսք, տպավորիչ հանգիստ է՝ տպավորիչ արժեքով:

Քանի որ համավարակը շարունակում է մնալ համաշխարհային օրակարգում, ոչ բոլոր արտագնա զբոսաշրջային ուղղություններն են ներառված ամառային հանգստի փաթեթներում. զբոսաշրջային ընկերությունները դեռ չեն առաջարկում, օրինակ, Չեխիա ուղղությունը, բայց սիրով տեղեկացնում են, որ արդեն «բաց է Գերմանիան»:

Նկատենք՝ օրերս հայտնի դարձավ, որ Եվրոպական խորհուրդը որոշել է Հայաստանը ներառել այն երկրների ցանկում, որի քաղաքացիների համար մուտքի սահմանափակումները կարող են չեղարկվել:

Մինչ վերջնական պարզ կդառնա մեզ «գրկաբաց» հյուրընկալող եվրոպական երկրների ցանկը, Հայաստանում շարունակվում է եվրոպական երկրներում հանգիստը կազմակերպելու իրարանցումը:

Նշենք նաև, որ Հայաստանից դուրս ճամփորդություններն ունեն հստակ կանոններ. Հայաստանի քաղաքացիները պետք է հետևեն հակահամաճարակային ընդհանուր պահանջներին՝ ներկայացնելով կորոնավիրուսի թեստի բացասական պատասխան, կամ պատվաստված լինեն համավարակի դեմ:

«Նախնական տվյալներով, առայժմ միայն թեստ են ուզում: Երկուշաբթի օրվանից ավելի հստակ կլինեն վիզաների ընթացակարգը և փաթեթների արժեքները,- Գերմանիայում հանգիստը կազմակերպելու մեր հարցերին ի պատասխան՝ փոխանցեցին զբոսաշրջային ընկերությունից, ապա ներկայացրին նախնական հաշվարկներ,- անձի հաշվով 7 օրը կկազմի 600-700 եվրոյից սկսած, սակայն կախված ավիատոմսի արժեքներից, հնարավոր է՝ փոփոխվի: Արժեքի մեջ ներառված է ավիատոմս, 3 աստղանի հյուրանոց, նախաճաշ»:

Ի դեպ, թեստերի մասին. գործակալությունները հիմնականում աշխատում են կոնկրետ լաբորատորիաների հետ:

«Մենք պայմանագիր ունենք լաբորատորիայի հետ, գրանցում ենք, գնում եք հանձնում եք, 10.000 դրամով»,- տեղեկացրեց զբոսաշրջային ընկերության աշխատակիցը:

Հարցին, թե քանի՞ անգամ է անհրաժեշտ հանձնել թեստ՝ նա պատասխանեց. «Եթե Վրաստան եք գնում, երրորդ օրը կրկին պետք է հանձնեք, եթե գնում եք Եգիպտոս կամ այլ տեղ, ընդամենը մեկ անգամ այստեղ եք հանձնում, և մեկ անգամ էլ վերադարձին՝ մեզ մոտ՝ օդանավակայանում»:

Հայ զբոսաշրջիկների համար ամենապահանջված ուղղություններից է շարունակում են մնալ հարևան Վրաստանը, Հունաստանը, Կիպրոսը, Իսպանիան, Իտալիան, Եգիպտոսը, Դուբայը:

Եգիպտոսում հուլիսի 12-ից, օրինակ, 1-շաբաթյա փաթեթը կարժենա 500 դոլար և 890 դոլար՝ մեկ չափահասի և մեկ երեխայի դեպքում: Փաթեթի արժեքում ներառված են ավիատոմսեր, գիշերակացը հինգաստղանի հյուրանոցում և երեքանգամյա սնունդ: COVID-19-ի ախտորոշիչ թեստի գումարը՝ առանձին:

Զբոսաշրջային ընկերությունները խորհուրդ չտվեցին մեկնել Դուբայ ամռան տապին՝ նշելով, որ կարելի է հետաձգել մինչև սեպտեմբեր-հոկտեմբեր ամիսները: Այս ուղղության դեպքում 1 անձի համար 7-օրյա փաթեթը կարժենա 500-600 դոլար, որը ներառում է հյուրանոց, ավիատոմս, նախաճաշ և վիզա: Թեստերը կրկին հաշվվում են առանձին:

Արտագնա տուր-մենեջերը որպես այլընտրանքային ուղղություն՝ առաջարկում է Հունաստանը՝ տեղեկացնելով, որ 4 աստղանի հյուրանոցում և միայն նախաճաշով փաթեթի արժեքը կկազմի 500-600 եվրո և ավել, 800-1000 եվրո՝ հինգաստղանի հյուրանոցի դեպքում:

Թեև Վրաստանը համեմատաբար մատչելի ուղղություն կարելի է համարել, սակայն զբոսաշրջիկների համար լրացուցիչ ծախս է համարվում COVID-19-ի ախտորոշիչ երկու հիմնական թեստերից բացի՝ երրորդ օրը Վրաստանում պարտադիր համարվող ևս մեկ թեստի անհրաժեշտությունը»,-գրում է թերթը։

Նյութն ամբողջությամբ կարդացեք թերթի այսօրվա համարում։