2020-ի երկրորդ կեսին, ներառյալ՝ պատերազմի ժամանակահատվածը, մահացել է 18-20 տարեկան 1250 արական սեռի ՀՀ քաղաքացի

2020 թվականի 3-րդ և 4-րդ եռամսյակներում ՀՀ-ում մահացել է 2000-2002 թվականներին ծնված 1250 արական սեռի ՀՀ քաղաքացի։ Այս մասին Tert.am-ի հարցմանն ի պատասխան հայտնել են ՀՀ վիճակագրական կոմիտեից։

Այսպիսով՝ 2020-ի երրորդ եռամսյակում՝ հուլիս-սեպտեմբեր ամիսներին ՀՀ-ում մահացել է 2000-2002 թվականներին ծնված 161 արական սեռի ՀՀ քաղաքացի։

Այսպիսով՝ 2020-ի երրորդ եռամսյակում մահացել է 2000 թվականին ծնված 44 արական սեռի ՀՀ քաղաքացի, 2001 թվականին ծնված 95 քաղաքացի, 2002 թվականին ծնված 22 քաղաքացի։

2020-ի 4-րդ եռամսյակում՝ մահացել է 2000-2002 թվականներին ծնված 1089 արական սեռի ՀՀ քաղաքացի։

Այսպիսով՝ 2020-ի չորրորդ եռամսյակում մահացել է 2000-ին ծնված 345, 2001-ին ծնված 551, 2002-ին ծնված 193 արական սեռի ՀՀ քաղաքացի։

Հիշեցնենք՝ 44-օրյա պատերազմը սկսվել էր 2020-ի սեպտեմբերի 27-ին՝ տարվա երրորդ եռամսյակի ավարտին, հրադադարի հայտարարությունն ընդունվել էր 2020-ի նոյեմբերի 9-ին։

Նշենք, որ մինչ այսօր չկան վերջնական տվյալներ 44-օրյա պատերազմի զոհերի, անհետ կորածների, գերիների թվերի վերաբերյալ։ 2021-ի հունիսի 7-ին Նիկոլ Փաշինյանը հայտարարել է, որ 44-օրյա պատերազմում զոհերի թիվը 3700-ին մոտ է, կարող է հասնել 4000-ի։