Երգչուհի Անդրա Դեյը մեկնաբանել է իր և Բրեդ Փիթի սիրավեպի մասին լուրերը

Ամերիկացի դերասանուհի և երգչուհի Անդրա Դեյը հերքել է hոլիվուդյան հայտնի դերասան Բրեդ Փիթի հետ սիրավեպի մասին լուրերը՝ դրանք որակելով «հոլիվուդյան հորինվածք»։

36-ամյա երգչուհին Entertainment Tonight-ի հետ զրույցում նշել է, որ իրականում երբեք չի հանդիպել դերասանին։

«Մենք չենք հանդիպում։ Նույնիսկ իրար չենք ճանաչում»,- ասել է Դեյը։

Երգչուհին նաև խոստովանել է՝ չնայած մայիսից շրջանառվող լուրերին, շարունակում է մնալ դերասանի երկրպագուն։

«Թեև պետք է խոստովանեմ՝ նա հրաշալի, տաղանդաշատ ու հիասքանչ դերասան է»,- հավելել է նա։

Ավելի վաղ Mirror-ը գրել էր, որ «Միացյալ Նահանգներն ընդդեմ Բիլլի Հոլիդեյի» (The United States vs. Billie Holiday) ֆիլմում կերտած դերի համար «Օսկար-2021»-ի «Լավագույն դերասանուհի» անվանակարգում առաջադրված դերասանուհին և Փիթը հանդիպել են ապրիլի 26-ին տեղի ունեցած մրցանակաբաշխության ժամանակ։

Նշենք, որ 36-ամյա Դեյը հայտնի է դարձել 2015 թվականին Cheers to the Fall դեբյուտային ալբոմի թողարկումից հետո։ Մեկ տարի անց նա առաջադրվել էր «Գրեմմի» մրցանակաբաշխության երկու անվանակարգերում։