ԵՄ-ն ներգաղթյալների մուտքը Եվրոպա կասեցնելու նպատակով Թուրքիային հավելյալ 3 միլիարդ եվրո կհատկացնի. Ուրսուլա ֆոն դեր Լյայեն

Եվրահանձնաժողովի նախագահ Ուրսուլա ֆոն դեր Լյայենը հայտնել է, որ Եվրամիությունը Թուրքիային 3 միլիարդ եվրո է խոստացել՝ 4 միլիոն փախստականներին երկրում պահելու համար, հայտնում է Եվրոպական հանձնաժողովի պաշտոնական կայքը։

«Ապագայում մենք նախատեսում ենք լրացուցիչ 3 միլիարդ եվրո հատկացնել Թուրքիային՝ մինչև 2024 թվականը փախստականներին աջակցելու համար։ Բացի այդ, մենք կօգնենք Թուրքիային ներգաղթն իր արևելյան սահմանին կառավարելու համար», - հայտնել է Եվրահանձնաժողովի նախագահը Բրյուսելում կայացած Եվրոպական խորհրդի գագաթնաժողովից հետո:

2016 թվականին Թուրքիան և ԵՄ-ն համաձայնության էին եկել սիրիացի փախստականների մուտքը Հունաստան կասեցնելու համար։ Համաձայնագրի համաձայն՝ ԵՄ-ն խոստացել էր երկու մասով 6 միլիարդ եվրոյի օգնություն տրամադրել Թուրքիային, որոնք պետք է օգտագործվեին ներգաղթյալներին օգնելու նախագծերի համար:

Հիշեցնենք, որ ԵՄ-ի և Թուրքիայի միջև հարաբերություններն անցյալ տարի լարվել էին, ինչը պայմանավորված էր Հունաստանի և Կիպրոսի հետ Միջերկրական ծովի արևելքում Թուրքիայի ունեցած հակասություններով։ Սակայն մարտին կայացած Եվրախորհրդի նիստում ԵՄ-ն նշել է, որ «պատրաստ է փուլային, համաչափ և հակադարձելի կարգով գործ ունենալ Թուրքիայի հետ, պայմանով, որ առկա դեէսկալացիան կայուն լինի, և որ Թուրքիան կառուցողական ներգրավվածություն կունենա»: Եվրոպական խորհուրդը, սակայն, նշել է, որ Թուրքիայում օրենքի գերակայությունն ու հիմնարար իրավունքները շարունակում են դաշինքի համար գլխավոր մտահոգությունը մնալ։

Հիշեցնենք նաև, որ Թուրքիան ցանկանում է ԵՄ անդամ պետություն դառնալ, սակայն անդամակցության գործընթացը վերջին տարիներին կանգ է առել, ինչը պայմանավորված է Անկարայի կողմից մարդու իրավունքների և դատական համակարգի պահանջվող չափանիշներին անհամապատասխանությամբ: