Թուրքիայում կանայք բողոքել են Էրդողանի` Ստամբուլյան կոնվենցիայից դուրս գալու որոշման դեմ

Ստամբուլում կանայք բողոքի ակցիա են անցկացրել նախագահ Ռեջեփ Թայիփ Էրդողանի` հուլիսի 1-ին Ստամբուլյան կոնվենցիայից դուրս գալու որոշման դեմ, հայտնում է France 24-ը:

Եվրոպայի խորհրդի կողմից 2011 թվականին ընդունված կոնվենցիան ուղղված է կանանց նկատմամբ և ընտանեկան բռնության դեմ: Թուրքիան առաջին երկիրն էր, որը 2011-ին ստորագրեց կոնվենցիան` դրան տալով իր առևտրային մայրաքաղաքի անվանումը: Դրանից հետո 45 երկիր, ինչպես նաև Եվրամիությունը ստորագրել է կոնվենցիան: Այնուամենայնիվ, մարտին Էրդողանը հրամանագիր էր արձակել, որով Թուրքիան չեղյալ էր հայտարարում կոնվենցիան: Թուրքիան հուլիսի 1-ին պաշտոնապես հետ կկանչի իր անդամակցությունը:

Կոնվենցիան ստորագրող պետություններից պահանջվում է հետաքննել բռնության մեղադրանքները և պատասխանատվության ենթարկել մեղավորներին: Բացի այդ, ստորագրողները համաձայնում են խթանել գենդերային հավասարությունը օրենսդրության և կրթության միջոցով:

Քննադատները մտավախություն ունեն, որ այս մերժումը կհանգեցնի Թուրքիայում կանանց սպանությունների թվի աճին: Ըստ կանանց իրավունքների պաշտպանության Kadin Cinayetlerini Durduracagiz Platformu կազմակերպության հրապարակած ուսումնասիրության, միայն մայիսին գրանցվել է ֆեմիցիդների հաստատված 17 և ևս 20 կասկածելի դեպք: Թուրքիան չի գրանցում կանանց սպանությունների պաշտոնական տվյալները: