Հուսով եմ, որ ՀՀ քաղաքացիների մեծամասնությունը հասկանում է՝ հիմնական խնդիրը ոչ թե ազատության կարգախոսներն են, այլ ազգի համախմբումը և երկրի զարգացումը․ ռուսաստանցի վերլուծաբան․ Tert.am

Եվրասիական տնտեսական միության ինստիտուտի տնօրեն Վլադիմիր Լեպեխինի հետ Tert.am-ը զրուցել է հունիսի 20-ին տեղի ունենալիք խորհրդարանական ընտրությունների քարոզարշավից ստացած իր տպավորությունների վերաբերյալ։ Նա ընտրարշավը դրական է գնահատում։ «Ես դրական եմ համարում ընդդիմության համախմբումը, առաջին հերթին և հենց Ռոբերտ Քոչարյան գործչի շուրջ, որպես փորձառու, կանխատեսելի և պատասխանատու քաղաքական գործչի, որը հակված է Հայաստանում ստեղծել ազգանպաստ խորհրդարան և կառավարություն»,- ասաց նա։

-Պարո՛ն Լեպեխին, մոտեցավ արդեն Հայաստանում խորհրդարանական ընտրությունների քարոզարշավի ավարտը։ Ինչպե՞ս կգնահատեք այն, ինչպե՞ս դրսևորեցին իրենց քաղաքական ուժերը։ Ձեր տպավորությամբ՝ որոնք են դրանցից ֆավորիտները։

-Հայաստանում ընտրարշավը շատ դրական եմ գնահատում:

Նախ մարդիկ գնացին փողոցներից դեպի իսկական կուսակցական-քաղաքական դաշտ, այսինքն՝ գերադասեցին կառուցողական մրցակցությունը իշխանությունների հետ հակամարտության գոտիների ընդլայնումից:

Երկրորդ՝ նախընտրական քարոզչության ընթացքում ընդդիմության մի զգալի մասը համախմբվեց: Միևնույն ժամանակ, ես դրական եմ համարում ընդդիմության համախմբումը, առաջին հերթին և հենց Ռոբերտ Քոչարյան գործչի շուրջ, որպես փորձառու, կանխատեսելի և պատասխանատու քաղաքական գործչի, որը հակված է Հայաստանում ստեղծել ազգանպաստ խորհրդարան և կառավարություն:

Երրորդ ՝ նշված քարոզչության ընթացքում ի հայտ եկավ Հայաստանի զարգացման հետագա ուղու հստակությունը: Դա, մասնավորապես, արտահայտվել է վերջերս Եվրասիական փորձագիտական ակումբի գիտական համաժողովի ժամանակ, որի ընթացքում հայ մտավորականների և քաղաքական գործիչների շուրթերից հնչեց «համախմբում, մոբիլիզացիա, արդիականացում» բանաձևը: Հայոց պետականությունը փրկելու համար ազգի համախմբումը սկսվեց «Հայաստան» դաշինքի շուրջ։ Հուսով եմ, որ այն խորհրդարանական ընտրություններից հետո կվերածվի ազգի մոբիլիզացիայի, որպեսզի այնուհետև ապահովի Հայաստանի Հանրապետության արդիականացված զարգացումը:

-Ի՞նչ եք կարծում՝ իշխող «Քաղաքացիական պայմանագիր» կուսակցությունն ունի՞ հաղթանակի հնարավորություն ընտրություններում։ Ինչպե՞ս կգնահատեք Նիկոլ Փաշինյանի նախընտրական քարոզարշավը։

-«Քաղաքացիական պայմանագիր» կուսակցությունը նախընտրական քարոզարշավի արդյունքում կարող է ձայների մեծամասնությունը ստանալ, թեկուզ միայն այն պատճառով, որ նրա մարդիկ այսօր վերահսկում են ընտրական հանձնաժողովների մեծամասնությունը: Բայց դա դժվար թե նշանակի հաղթանակ: Ի վերջո, կարևոր է, որ նոր խորհրդարանի ձևավորումը հանգեցնի առողջ կառավարության ձևավորմանը: Սակայն այսօր ոչ ոք չգիտի, թե ինչպես կվարվեն, օրինակ՝ «Բարգավաճ Հայաստանը» և մանդատներ ստացող մյուս կուսակցություններն ու դաշինքները: Հնարավոր է, որ նրանք չսատարեն «Քաղաքացիական պայմանագիր» կուսակցության թեկնածուին:

-Ձեր տպավորությամբ՝ ի՞նչ է ընտրելու ՀՀ քաղաքացին, ի՞նչն է այս ընտրություններում նրա համար կարևոր։

-Հայ հասարակությունը հասունանում է: Այսինքն՝ 2018-ին «Սորոսի» խոստումներով խաբված ընտրողների մի զգալի մասը ավելի ու ավելի է գիտակցում ներկայիս կառավարության արևմտամետ կուրսի վնասակարությունը: Եվ սա առաջին քայլն է դեպի պոպուլիստներին աջակցելուց դեպի այն քաղաքական գործիչներին աջակցելը, ովքեր ի վիճակի են ամբողջ ճանապարհը գնալ՝ պահպանելու հայկական պետականությունը և դիմակայելու այն ուժերին, որոնց պատճառով անցյալ աշնանը հայերը գրեթե կորցրեցին Արցախը:

Հուսով եմ, որ ՀՀ քաղաքացիների մեծամասնությունը հասկանում է, որ այսօր ՀՀ հիմնական խնդիրը ոչ թե ազատության կարգախոսներն են, ոչ թե ժողովրդավարության և եվրոպական ինտեգրման թեմայի դեմագոգիան է, այլ ազգի համախմբումը և երկրի զարգացումը:

-Ի՞նչ եք կարծում՝ ի՞նչ դիրքորոշում ունի Ռուսաստանը Հայաստանի ընտրությունների վերաբերյալ։

-Ռուսաստանի դիրքորոշումը Հայաստանում ընտրությունների վերաբերյալ շատ պարզ է․ կաջակցի հայ ժողովրդի ցանկացած ընտրություն: