Christian Dior նորաձևության տունը նախապատրաստվում է այսօր երեկոյան Աթենքի Պանաթինաիկոս մարզադաշտում կայանալիք ցուցադրությանը, որը տեղի է ունենում ի պատիվ Հունական հեղափոխության 200-րդ տարեդարձի

Christian Dior նորաձևության տունը նախապատրաստվում է այսօր երեկոյան Աթենքի Պանաթինաիկոս մարզադաշտում կայանալիք ցուցադրությանը, որը տեղի է ունենում ի պատիվ Հունական հեղափոխության 200-րդ տարեդարձի, հայտնում է Greek City Times թերթը։

Նորաձևության տունը ներկայացնելու է հունական ազդեցությունը եվրոպական քաղաքակրթության զարգացման վրա։

Միաձուլելով ավանդույթներն ու արդիականությունը՝ Dior Cruise Collection-ը կարևորելու է հունական ավանդական ձեռագործությունը և լույսի (phos) և գեղեցկության (kallos) հին հունական գեղագիտական արժեքները: Այս հավաքածուն ստեղծելու համար Christian Dior-ը համագործակցել է հույն ստեղծագործողների հետ՝ մասնագիտանալով մանածագործության, ասեղնագործության և մետաքսի, խեցեգործության և զարդերի պատրաստման ոլորտներում։

Միջոցառումը, որը հյուրընկալելու է 400 բարձրաստիճան հյուրերի, կայանալու է այսօր երեկոյան։

Ինչպես ավելի վաղ տեղեկացրել էր Tert.am-ը, հունիսի 17-ին ֆրանսիական նորաձևության տունը Պանաթինաիկոս մարզադաշտը կվերածի «պոդիումի»՝ ներկայացնելով նոր «Կրուիզ 2022» հավաքածուն։ Հավաքածուն կրում է հունական ազդեցություն և նվիրված է Հունաստանի անկախության շարժման 200-ամյակին։ Նորաձևության ցուցադրությունից բացի տեղի են ունենալու նաև նկարահանումներ՝ Հունաստանի պատմական և տպավորիչ վայրերում՝ ներառյալ Ակրոպոլիսում։

«Դիցաբանությունից մինչև «Ոդիսական», ճարտարապետությունից և փիլիսոփայությունից մինչև անգին արհեստներ․ Աթենքն ինձ համար երազանքի վայր է՝ շոու բեմադրելու և առավել քան երբևէ մշակույթների կախարդանքն ու փոխանցումը տոնելու համար», - ասել էր Մարիա Գրացիա Կյուրին։