Բայդենը կոպտել է CNN-ի լրագրողին, ապա ներողություն խնդրել

ԱՄՆ նախագահ Ջո Բայդենը չորեքշաբթի կտրուկ է պատասխանել CNN-ի լրագրողի հարցին, ապա ներողություն խնդրել: Այս մասին հայտնում է ТАСС-ը:

Ժնևում Բայդենի ասուլիսի ավարտին, երբ վերջինս արդեն քայլում էր դեպի ելքը, հեռուստաընկերության թղթակից Քեյթլին Քոլինզը հարցրել է, թե ինչու է ամերիկացի առաջնորդը համոզված, որ իր ռուս գործընկեր Վլադիմիր Պուտինը «կփոխի իր վարքը»:

«Ես վստահ չեմ՝ արդյոք նա կփոխի իր պահվածքը: Գրողը տանի ... Ի՞նչ էիք անում այս ամբողջ ընթացքում: Ե՞րբ ասացի, որ վստահ եմ», - արձագանքել է Բայդենը,- «Եկեք անկեղծ լինենք, ես ասացի, որ նրանց վարքը կփոխվի, եթե ամբողջ աշխարհը արձագանքի նրանց, և դա կիջեցնի իրենց կարգավիճակը աշխարհում: Ես ոչնչում համոզված չեմ, պարզապես փաստն եմ ներկայացնում»:

Քոլինզը այնուհետև նշել է, որ երկու առաջնորդների հանդիպումից հետո կայացած իր ասուլիսի ժամանակ Պուտինը «հերքել է կիբերհարձակումներում ներգրավվածությունը, նվազագույն է գնահատել մարդու իրավունքների ոտնահարումները և նույնիսկ հրաժարվել Ալեքսեյ Նավալնիի անունը տալ»:

«Եվ ինչպե՞ս կարելի է դա համարել կառուցողական հանդիպում, ինչպես այնանվանում էր նախագահ Պուտինը», - պնդել է Քոլինզը: Բայդենն այս անգամ հարցին չի պատասխանել:

«Եթե դուք դա չեք հասկանում, ապա ճիշտ գործով չեք զբաղվում», - եզրափակել է ԱՄՆ նախագահը:

Ավելի ուշ՝ Ժնևից մեկնելուց առաջ, Բայդենը ներողություն է խնդրել լրագրողից կոշտ պատասխանի համար: