Էրդողանը հայտարարել է, որ Թուրքիան գլխավոր հյուպատոսություն կբացի Շուշիում

Թուրքիայի նախագահ Ռեջեփ Թայիփ Էրդողանը, որը գտնվում է Արցախյան պատերազմից հետո Բաքվի վերահսկողության տակ անցած Շուշի քաղաքում, հայտարարել է, որ Անկարան գլխավոր հյուպատոսություն կբացի Շուշիում, գրում է minval.az-ը:

Նա այդ մասին ասել է Ադրբեջանի նախագահ Իլհամ Ալիևի հետ Շուշիում կայացած համատեղ ասուլիսում: Էրդողանի խոսքով` գլխավոր հյուպատոսության բացումը տեղի կունենա առաջիկայում:

Նշենք, որ Շուշիում տեղի է ունեցել է Թուրքիայի և Ադրբեջանի նախագահների մասնակցությամբ թուրք-ադրբեջանական փաստաթղթերի ստորագրման արարողությունը. մասնավորապես ստորագրվել է Շուշիի հռչակագիրը:

«Այսօր մենք ոչ միայն խոսում ենք Զանգեզուրի միջանցքի մասին, որը ճանապարհային և երկաթուղային ճանապարհով կապելու է Ադրբեջանը և Թուրքիան, այլ նաև գործնական գործողություններ ենք իրականացնում», - ընդգծել է Ադրբեջանի ղեկավարը:

Ըստ Ալիևի` ստորագրված փաստաթուղթը հստակ դրույթներ է պարունակում Զանգեզուրի միջանցքի վերաբերյալ:

«Հռչակագիրը հիմնված է Կարսի պատմական պայմանագրի վրա: Այն վերաբերում է համագործակցության տարբեր ոլորտներին», - բացատրել է նա` հավելելով, որ դաշնակցության վերաբերյալ այս հռչակագիրն ամենաբարձր մակարդակին է բարձրացնում Բաքվի ու Անկարայի հարաբերությունները:

Իլհամ Ալիևն ասել է, որ Շուշիի հռչակագրում շոշափվում են երկու երկրների միջև պաշտպանական ոլորտում փոխօգնության խնդիրները: