Պատվաստման գործընթացի ձախողման մեղավորությունը պետք է փնտրել նախարարության սխալ և թերի գործունեության մեջ․Արժանապատիվ բուժաշխատողների միության նամակը՝ ՄԻՊ-ին

Արժանապատիվ բուժաշխատողների միությունը բաց նամակ հղել ՀՀ Մարդու իրավունքների պաշտպան Արման Թաթոյանին։

Նամակը ներկայացնում ենք ստորև․

«Հարգելի պարոն Թաթոյան,

Տեղեկացնում ենք Ձեզ, որ Առողջապահության նախարարի պաշտոնակատար Ա․Ավանեսյանը 2021թ․ մայիսի 2-ին ՀՀ կառավարության կայքին տրված հարցազրույցի ընթացքում հնչեցրել է ՀՀ օրենսդրությանը հակասող մի շարք արտահայտություններ։

Մասնավորապես, հարցին թե «Կա՞ վտանգ, որ ներկրված պատվաստանյութի ժամկետը կլրանա», Ա․Ավանեսյանը պատասխանում է․ «Իհարկե կա նման վտանգ, պետությունը ջանք է թափել, ֆինանսներ է հատկացրել և հնարավորություն է ընձեռել քաղաքացիներին անվճար կերպով պատվաստվել և պաշտպանվել, պաշտպանել իրենց կյանքն ու առողջությունը։ Բայց իհարկե մենք չենք կարող ստիպողաբար մարդկանց պատվաստել, բայց ասեմ, որ այլ երկրներում, այն երկրերում որոնք բավական բարձր ցուցանիշ ունեն պատվաստման՝ շատ ավելի կոշտ մեթոդների են դիմում և, օրինակ, ԳՈՒՑԵ ՀԵՏԱԳԱՅՈՒՄ ԱՅՆ

ՔԱՂԱՔԱՑԻՆԵՐԸ, ՈՎՔԵՐ ՈՐ ՊԱՏՎԱՍՏՎԱԾ ՉԵՆ՝ ԵՐԿԻՐԸ ԼՔԵԼՈՒ, ՎԵՐԱԴԱՌՆԱԼՈՒ ԽՆԴԻՐ ՈՒՆԵՆԱՆ, ՈՒՆԵՆԱՆ ԽՆԴԻՐ ԲՈՒԺՎԵԼՈՒ, չէ որ պետությունն ահռելի ռեսուրսներ է ծախսում նաև հիվանդների բուժման վրա։ Եվ եթե կա դարմանը, ինչու՞ պիտի նաև կրկնակի ծախսեր կատարվեն»։

Նախ ցանկանում ենք նշել, որ պատվաստման գործընթացի ձախողման մեղավորությունը պետք է փնտրել նախարարության սխալ և թերի գործունեության, ագրեսիվ քարոզչության շրջանակներում, քանի որ նրանց վարած չկշռադատված քաղաքականությունը այս հարցում հանգեցրել է հանրային անվստահության, ինչի հետևանքով մարդիկ խուսափում են պատվաստվելուց:

Ա.Ավանեսյանի կողմից հնչեցրած արտահայտությունները հակասում են ՀՀ Սահմանադրության և օրենքների մի շարք դրույթներին, մասնավորապես՝

1. ՀՀ Սահմանադրության 85-րդ հոդվածի 1–ին կետին, համաձայն որի.

«1. Յուրաքանչյուր ոք, օրենքին համապատասխան, ունի առողջության պահպանման իրավունք»:

2. ՀՀ Սահմանադրության 40-րդ հոդվածի 2-րդ կետին, համաձայն որի.

«Յուրաքանչյուր ոք ունի Հայաստանի Հանրապետությունից դուրս գալու իրավունք»:

3. ՀՀ Սահմանադրության 40-րդ հոդվածի 3-րդ կետին, համաձայն որի.

«Յուրաքանչյուր քաղաքացի և Հայաստանի Հանրապետությունում օրինական հիմքերով բնակվելու իրավունք ունեցող յուրաքանչյուր ոք ունի Հայաստանի Հանրապետություն մուտք գործելու իրավունք»:

4. ՀՀ Սահմանադրության 40-րդ հոդվածի 4-րդ կետին, համաձայն որի. «Քաղաքացու` Հայաստանի Հանրապետություն մուտք գործելու իրավունքը սահմանափակման ենթակա չէ»:

5. «Բնակչության բժշկական օգնության և սպասարկման մասին» ՀՀ օրենքի 13-րդ հոդվածի 1-ին մասի, համաձայն որի՝

«Յուրաքանչյուր ոք, անկախ ազգությունից, ռասայից, սեռից, լեզվից, դավանանքից, տարիքից, առողջական վիճակից, հաշմանդամությունից, քաղաքական կամ այլ հայացքներից, սոցիալական ծագումից, գույքային կամ այլ դրությունից, Սահմանադրությամբ, սույն օրենքով և այլ օրենքներով, ինչպես նաև Հայաստանի Հանրապետության միջազգային պայմանագրերով սահմանված կարգով ունի բժշկական օգնություն և սպասարկում ստանալու իրավունք»:

Հիմք ընդունելով վերոգրյալը և ՀՀ Սահմանադրության 191-րդ հոդվածի 1-ին մասը, խնդրում ենք Ձեզ ուսումնասիրել Առողջապահության նախարարի պաշտոնակատար Ա.Ավանեսյանի հակաօրինական հայտարարությունները և հայտնել Ձեր դիրքորոշումը դրանց վերաբերյալ»։