Ակնհայտ կեղծիք Ադրբեջանում. նախագահական ընտրությունների արդյունքները հրապարակվել են դեռ երեկ

Ադրբեջանում նախագահական ընտրությունների արդյունքները (որոնք սկսվել են այսօր՝ հոկտեմբերի 9-ին) համացանց են ներբեռնվել դեռ երեկ: Այդ մասին իր բլոգում հայտնել է լրագրող Մովսուն Գաջիևը:

Գաջիևի խոսքով՝ Ադրբեջանի ԿԸՀ (Կենտրոնական ընտրական հանձնաժողովը) ստեղծել է հատուկ ծրագիր iPhone և Android հեռախոսների համար, որոնց նպատակը եղել է հավաքել և վերլուծել արդյունքները: Լրագրողը նշել է, որ ծրագրի ստեղծող Happy Baku ընկերությունը տեխնիկական սխալ է թույլ տվել և այն ակտիվացվել է ընտրություններից մեկ օր առաջ:

Համաձայն այդ ծրագրի տվյալների՝ Իլհամ Ալիևը հավաքել է ձայների 72,76 %-ը, իսկ Ադրբեջանի ընդդիմության ներկայացուցիչ Ջամիլ Հասանլին՝ ընդամենը 7.4 %-ը: Ծրագիրը նաև ցույց է տալիս, թե որ ընտրատարածքում քանի մարդ է ընտրել: Օրինակ՝ 58 շրջանում մինչև առավոտյան ժամը 10 քվեարկել է ընտրողների 28,94 տոկոսը: