ԱԺ արտահերթ ընտրություններին մոտ 70 մլն քվեաթերթիկ կլինի, դրանց տպագրության համար կծախսվի մոտ 460 մլն դրամ․ Տիգրան Մուկուչյան

ԱԺ արտահերթ ընտրությունների քվեաթերթիկների քանակը 26 մասնակից ուժերի պարագայում լինելու է մոտ 70 միլիոն։ Այս մասին լրագրողների հետ ճեպազրույցում ասաց ԿԸՀ նախագահ Տիգրան Մուկուչյանը։

«Քվեաթերթիկների ընդհանուր տպագրության համար մոտ 460 մլն դրամ է ծախսվելու»,-ասաց նա՝ նշելով, որ ընտրությունների կազմակերպման համար ԿԸՀ-ին հատկացված միջոցների մոտ 80 տոկոսը ծախսվում է որպես աշխատավարձ։

Անդրադառնալով դիտարկմանը, թե մտահոգություններ կան, որ այս ընտրություններին ցածր մասնակցություն կարձանագրվի, արդյո՞ք ակտիվություն նկատվել է այն մարդկանց շրջանում, որոնք գրանցված են մարզերում, բայց փաստացի բնակվում են Երևանում, Մուկուչյանն արձագանքեց, թե կդժվարանա մասնակցության վերաբերյալ որևէ տեսակետ հայտնել։

«Պետք է նկատել, որ բավականին մեծ թվով ուժեր են մասնակցում ընտրություններին, և մասնակցության վերաբերյալ միանշանակ դատողություններ անելը, կարծում եմ, ժամանակավրեպ է։ Անձինք, որոնք ցանկանում են քվեարկել ըստ գտնվելու վայրի, մինչև հունիսի 10-ը դիմելու իրավունք ունեն․ այս պահին մեզ նման տեղեկատվություն չի փոխանցվել ամփոփված վիճակում»,-ասաց նա։

Ինչ վերաբերում է Մուկուչյանին ուղղված տարաբնույթ քննադատություններին ու հարցին՝ արդյոք քաղաքական ուժերի ակտիվ գործունեության ընթացքում իրեն ու ԿԸՀ-ին թիրախավորված նկատե՞լ է, ԿԸՀ նախագահն ասաց, որ հանձնաժողովն աշխատում է բացառապես Ընտրական օրենսգրքի պահանջներին համապատասխան, բոլոր գործառույթներն իրականացնելու է այդ պահանջներով։

«Քարոզարշավի մեկնարկին մենք հանդես կգանք համապատասխան կոչով՝ ուղղված բոլոր թեկնածուներին, որովհետև մենք կարևորում ենք, որ քարոզարշավի ընթացքում պահպանվեն ԸՕ բոլոր կանոնակարգումները։ Քարոզարշավն ընդամենը 12 օր է տևելու, և ցանկացած նորմի խախտում հայտնաբերելու դեպքում արձագանքը պետք է լինի օպերատիվ»,-ասաց նա։

Տիգրան Մուկուչյանը նաև հայտնեց, որ որոշ թեկնածուներ՝ մոտ 2-3, ինքնաբացարկ են հայտնել, ու առաջիկա նիստերի ընթացքում այդ դիմումների վերաբերյալ որոշումներ կկայացվեն։