ԱՄՆ-ում 9-ամյա և 4-ամյա քույրերն առևանգել են ծնողների մեքենան, որպեսզի հասնեն Կալիֆորնիա ու լողան դելֆինների հետ

ԱՄՆ Յուտա նահանգում երկու մանկահասակ քույր առևանգել են ծնողների մեքենան, որպեսզի հասնեն Կալիֆորնիա, գնան լողափ ու լողան դելֆինների հետ, գրում է The Guardian-ը:

9-ամյա և 4-ամյա քույրերը նստել են մեքենայի ղեկին, սակայն որոշ ժամանակ անց բախվել են մեկ այլ մեքենայի: Միջադեպի հետևանքով որևէ մեկը չի տուժել. քույրերը կրել են ամրագոտի, ինչի մասին հայտնել են ոստիկանությունից:

Նշվում է, որ արկածախնդիր երեխաները բանալիները գաղտնի վերցրել են, ապա նկուղով տնից դուրս եկել: Այնուհետև ղեկին է նստել ավագ քույրը: Հատկանշական է, որ նրանք 10 մղոն են անցել, ինչից հետո էլ տեղի է ունեցել բախումը մեկ այլ մեքենային:

Աղջիկները ոստիկաններին պատմել են, որ ցանկացել են ընդամենը Կալիֆորնիա հասնել ու այնտեղ լողալ դելֆինների հետ, ուստի այդ նպատակով նրանք գիշերվա երեքին տնից դուրս են եկել:

Ծնողները սարսափահար են եղել` իմանալով կատարվածի մասին: