Իսրայելն ու Եգիպտոսը քննարկում են ՀԱՄԱՍ-ի հետ հրադադարն ամրապնդելու հարցերը

Եգիպտոսն ու Իսրայելն անցկացնում են բանակցություններ բարձր մակարդակում։ Բանակցությունների հիմնական թեմաներն են Իսրայելի եւ ՀԱՄԱՍ-ի միջեւ հրադադարի ամրապնդումը, անկլավի մեծ մասը ավերակների վերածած 11-օրյա պատերազմից հետո Գազայի հատվածի վերականգնումը, գրում է Politico-ն։

Եգիպտոսի արտաքին գործերի նախարարության հայտարարության համաձայն՝ Եգիպտոսի ԱԳՆ Սամեխ Շուքրին հանդիպել է իր իսրայելցի գործընկեր Գաբի Աշքենազիի հետ, որը կիրակի ժամանել էր Կահիրե։ Դա Իսրայելի ԱԳՆ-ի առաջին հրապարակային անցն է Եգիպտոսում 2008 թվականից ի վեր։

Երկու երկրների նախարարները կքննարկեն այնպիսի թեմաներ, ինչպես հրադադարն ու իսրայելցի զինվորների եւ քաղաքացիների ազատագրումը, որոնք պահվում են ՀԱՄԱՍ-ի կողմից։ «Մենք կքննարկենք ՀԱՄԱՍ-ի հետ մշտական հրադադարի հաստատումը, Գազայի հատվածում հումանիտար օգնության եւ վերականգնման մեխանիզմների տրամադրումը»,-գրել է Աշքենազին թվիթերյան իր էջում Կահիրե մեկնելուն պես։

Միեւնույն ժամանակ Եգիպտոսի նախագահ Աբդել Ֆաթախ էլ Սիսին Թել Ավիվ է ուղարկել երկրի հետախուզության ղեկավարին վարչապետ Բինյամին Նեթանյահուի եւ Իսրայելի այլ պաշտոնական ներկայացուցիչների հետ բանակցելու համար։ Նրանք կքննարկեն Գազայում հրադադարի ռեժիմի ամրապնդումն ու պաղեստինյան տարածքներում վերջին իրադարձությունները։

Գլխավոր հետախուզական վարչության ղեկավար Աբաս Քամելը նաեւ կհանդիպի Ռամալլահում Պաղեստինի պաշտոնական անձանց հետ նախքան ՀԱՄԱՍ-ի առաջնորդների հետ բանակցելու նպատակով Գազայի հատված ուղեւորվելը։ Ակնկալվում է, որ Իսրայելի պաշտոնական անձանց հետ քննարկումները կանդրադառնան նաեւ միջոցների համալիրին, որոնք թույլ կտան փոխադրել ռեսուրսներ, էլեկտրականություն եւ վառելիք անկլավի տարածք, ինչպես նաեւ ընդլայնել ծովային տարածությունը, որը թույլատրված է Գազայի ձկնորսների համար։