Բաշար Ասադը գնում է դեպի նախագահության 21-րդ տարին. Коммерсантъ-ը` երկրում կայացած նախագահական ընտրությունների մասին

Մայիսի 26-ին Սիրիայում կայացել են նախագահական ընտրություններ, որոնց անդրադարձել է Коммерсантъ պարբերականը` մանրամասնելով, որ երկրի ղեկավար Բաշար ալ Ասադի համար, որի դեպքում հաղթանակը կանխորոշված է նախապես, քվեարկությունն իր դիրքի հաստատուն լինելն ի ցույց դնելու առիթ էր: Սակայն նախագահի նկատմամբ համընդհանուր սիրո հաճելի պատկերը խամրեցրել են երկրի մի շարք շրջաններում ընտրությունները բոյկոտելու վերաբերյալ կոչերը, ինչպես նաև Արևմուտքի կողմից ընտրությունները չճանաչելը:

Սիրիայում կայացած նախագահական ընտրություններին մասնակցել է երեք թեկնածու. պետության գործող ղեկավար Բաշար ալ Ասադը, Ժողովրդական խորհրդի (խորհրդարանի) գործերի նախկին նախարար, Սոցիալիստական միության կուսակցության անդամ Աբդուլլահ Սալում Աբդուլլահը և ներքին ընդդիմության ներկայացուցիչ Մահմուդ Ահմադ Մարայը: Ընտրություններում հաղթողն իրականում հայտնի էր նախապես, ուստի քվեարկությունը, ըստ էության, հանրաքվե էր Բաշար ալ Ասադի նկատմամբ վստահության հարցով, որը կմնա իշխանության ղեկին ևս յոթ տարի: Հայտնի է, որ նա երկիրը ղեկավարում է 2000թ.-ից:

«Կայացած ընտրություններում Դամասկոսի համար կարևոր էր ստեղծել ժողովրդավարական գործընթացի տեսանելիություն: Այդ նպատակով, մասնավորապես, ընտրություններին ներգրավվել է ներքին ընդդիմության թեկնածու: Արտաքին ընդդիմությունը բոյկոտել է ընտրությունները, քանի որ դրանք համարել է ֆարս: Բայց սիրիական իշխանությունների համար քվեարկությունը դարձել է պատերազմում հաղթանակի խորհրդանիշ: Սա էլ դարձել է ընտրությունների օրը նախագահի ելույթի լեյտմոտիվը»,-գրում է աղբյուրը` մանրամասնելով, որ քվեարկության օրվա նախօրեին Մեծ Բրիտանիայի, ԱՄՆ-ի, Գերմանիայի, Ֆրանսիայի և Իտալիայի արտգործնախարարները հանդես են եկել համատեղ հայտարարությամբ: Դրանում նրանք միջազգային հանրությանը կոչ են արել «անվերապահորեն մերժել Ասադի վարչակարգի օրինականությունն ապահովելու փորձը»: Հայտարարության մեջ նշվում է, որ ընտրությունները «չեն լինի ազատ կամ արդար»:

Անկարան ևս հավատարիմ է այս դիրքորոշմանը: Ավելին, Թուրքիան և Գերմանիան թույլ չեն տվել այնտեղ բնակվող սիրիացիներին ընտրություններ անցկացնել իրենց տարածքում: Միևնույն ժամանակ, Ռուսաստանը դրական գնահատական է տվել Սիրիայում անցկացվող ընտրություններին` ընդգծելով, որ Սիրիայում նախագահական ընտրություններն անցկացվում են երկրի գործող սահմանադրության և ազգային օրենսդրության լիարժեք համապատասխանությամբ:

«Միակ հարցն այն է, թե ինչպես է ապրելու Սիրիան հաջորդ յոթ տարին: Երկիրը մնում է մասնատված, և մնացած տարածքներն առանց արյունահեղության վերադարձնելու հեռանկարները դեռևս իրատեսական չեն, երկրի մյուս շրջաններում, որտեղ հաշտություն է կնքվել, իրավիճակը կասկածելի է, ինչը ցույց տվեց Դերաայի և հարավային մյուս շրջանների օրինակը: Սիրիայից դուրս կա շուրջ 5,5 միլիոն փախստական, ավելի քան 6 միլիոնը ներքին տեղահանվածներ են: Տնտեսությունը մնում է հիմնական խնդիրներից մեկը: Գրեթե անհնար է ճշգրիտ հաշվարկել տնտեսական վնասը մի երկրում, որը պատերազմում է ավելի քան տաս տարի: Մի շարք ուսումնասիրությունների համաձայն՝ պատերազմը ոչնչացրել է սիրիական ենթակառուցվածքների մոտ 40%-ը: Տարբեր գնահատականների համաձայն` Սիրիայի վերակառուցման համար կարող է պահանջվել 250- 530 մլրդ դոլար:

Արևմուտքը չի պատրաստվում վերացնել Սիրիայի նկատմամբ պատժամիջոցները և գումարներ տալ երկիրը վերակառուցելու համար, քանի դեռ չեն իրականացվել քաղաքական բարեփոխումներ, ինչը նշանակում է մինչև Բաշար ալ Ասադի հեռացումը:

Միևնույն ժամանակ, իրենց հաղթող համարող Սիրիայի իշխանությունները հակված չեն քաղաքական փոխզիջումների, մինչդեռ տնտեսական ճգնաժամը կարող է երկրում սոցիալական պայթյուն առաջացնել և հանգեցնել նոր արյունահեղության»,-եզրափակել է աղբյուրը: