Տիգրան Ավինյանը չի լինելու նախընտրական ցուցակում, դա իր անձնական որոշումն է, հավելյալ մեկնաբանությունների համար դիմեք նրան․ Լիլիթ Մակունց (տեսանյութ)

ՀՀ-ում փոքր կրպակ ունեցողից մինչև մինչև մեծ ընկերություն ունեցողները համարվում են գործարարներ։ Երբ նման անձինք, անկախ բիզնեսի չափերից, քաղաքականությամբ զբաղվելու հայտ են ներկայացնում, ՀՀ օրենսդրությունը նախատեսում է կարգավորման եղանակներ՝ ոչ թե արգելում է զբաղվել նրանց քաղաքականությամբ, այլ արգելում է դրանց համատեղումը։ Այս մասին լրագրողների հետ ճեպազրույցի ժամանակ ասաց ԱԺ «Իմ քայլը» խմբակցության ղեկավար Լիլիթ Մակունցը՝ անդրադառնալով «Իմ քայլի» նախընտրական ցուցակում գործարարներ Խաչատուր Սուքիասյանի և Գուգեն Արսենյանի անունների առկայությանը՝ այն դեպքում, երբ ժամանակին Նիկոլ Փաշինյանը հայտարարել էր, որ գործարարները խորհրդարանում պետք է տեղ չունենան։

Մակունցը նշեց, որ այդ համատեղելիության սկզբունքի խախտման դեպքերի համար գոյություն ունեն էթիկայի և կոռուպցիայի կանխարգելման հանձնաժողովներ։

«Իմ քայլը» խմբակցության ղեկավարը վստահ է, որ այլ ուժերի ցուցակներում ևս ընդգրկված կլինեն տարբեր գործարարներ. «Այն, որ բիզնեսը պետք է քաղաքականությունից տարանջատված լինի, ոչ միայն քաղաքական խոսք է, այլ նաև օրենքով սահմանված սկզբունք։ Մենք շարունակում ենք պնդել, որ այն գործարաները, որոնք քաղաքականությամբ զբաղվելու հայտ են ներկայացրել, չեն կարող դրանք համատեղել»։

Հարցին՝ հնարավոր է սահմանում ստեղծված իրավիճակի պատճառով չեղարկվեն ընտրությունները, Մակունցը նշեց` դեռևս նման քննարկում չկա։

Անդրադառնալով նախընտրական ցուցակներում Տիգրան Ավինյանի, Նիկոլայ Բաղդասարյանի և Արտակ Մանուկյանի անունների բացակայությանը՝ Մակունցը նշեց, որ դա իրենց անձնական որոշումն է և որ նրանք շարունակում են լինել թիմի անդամ։

Ինչ վերաբերում է իր և Տիգրան Ավինյանի դեսպան նշանակվելու մասին լուրերին, Մակունցը նշեց․ «Տիգրան Ավինյանի մասով որևէ տեղեկություն չունեմ, իմ մասով ԱՄՆ-ից հաստատումը արդեն կա, սակայն որոշումը կկայացվի ընտրություններից հետո»։