Հայդուկական շարժման ժամանակն անցել է. «Առավոտ»

«Առավոտ» թերթը գրում է.

«Հավանաբար, Հայաստանում և արտերկրի հայկական շրջանակներում կան անհոգ տրամադրություններ ունեցող մարդիկ, որոնք կարծում են, թե Սյունիքում պատերազմի բռնկման վտանգ չկա, և Ալիևի սպառնալիքները՝ «բացել Զանգեզուրի միջանցքը»՝ անհրաժեշտության դեպքում նաև ուժ կիրառելով, պարզապես օդի մեջ ասված բառեր են: Բայց Հայաստանում հիմնականում բոլորը, անկախ իրենց քաղաքական հայացքներից, հասկանում են, որ պատերազմի շարունակության վտանգը, այդ անգամ արդեն՝ ՀՀ ինքնիշխան տարածքում, միանգամայն իրական է:

Կա ևս մի պատրանք, և այս մեկը բավականին տարածված է՝ իբր «ռուսը մեզ կօգնի», «պարսիկը չի թողնի» և այլն: Դա մոլորություն է. գուցե թղթի վրա, զուտ իրավաբանորեն, մեզ պարտավոր են ռազմական աջակցություն ցույց տալ, բայց զուտ քաղաքական տրամաբանության մեջ դա այսօրվա վիճակում հնարավոր չէ:

Այնպես որ Հայաստանի սահմանը անառիկ պահելու պարտականությունը պետք է կատարեն ՀՀ Զինված ուժերը, սահմանապահները: Բայց՝ միա՛յն դրանք, միա՛յն պետությունը ներկայացնող կառույցը: Բոլոր մնացած խոսակցությունները ֆիդայիների, կամավորների և հայդուկների մասին առնվազն մեկ դարով ուշացել են:

Նման ինքնագործունեության դեմ կարելի է բերել բազմաթիվ փաստարկներ, ես բերեմ դրանցից երեքը:

1/ Մենք տեսանք, թե ինչպես ընթացավ վերջին պատերազմը: Այն, իր գերակշիռ մասով, տեխնոլոգիական էր: Պարզապես հրացանը կամ թեկուզ ինքնաձիգը ուսին գցած «ֆիդային» չի կարող այստեղ որոշիչ դեր խաղալ: Ժամանակակից պատերազմում հակառակորդի կենդանի ուժը և զինտեխնիկան նախօրոք տեղորոշվում է (այդ թվում նաև՝ տիեզերքից) և ոչնչացվում տեխնիկական միջոցներով: Եվ դրա դեմ կիրառվում են պաշտպանական միջոցներ, որոնք նույնպես նման չեն հրացանին և ինքնաձիգին:

2/ Հայդուկյան ոճով արտահայտվող մասնավոր նախաձեռնությունը (որքան էլ անկեղծ լինի) միայն խճճելու է իրավիճակը: Մենք արդեն տեսել ենք, որ ինքնագլուխ, առանց կոորդինացիայի գործող ջոկատներն առնվազն որևէ օգուտ չեն բերել: Որքան էլ անորակ և ձախողված լինեն այսօրվա իշխանությունները, պետությանը խանգարել բոլոր դեպքերում չարժե: Իսկ հետագայում Ազգային ժողովը պետք է հստակ օրենսդրություն ընդունի՝ նման դեպքերում պահեստազորայինների և մնացածների պետական կառույցներում գործունեության վերաբերյալ։

3/ Իմանալով այս իշխանությունների, մեղմ ասած, տարօրինակ բնավորությունը, կարելի է կանխատեսել, որ ցանկացած անհաջողության դեպքում վարչապետը մեղքը կգցի նաև կամավորների վրա՝ կասի, որ նրանք լավ չէին կռվում, այստեղ զիջել են, այնտեղ փախել են, թասիբը չէր եռում և այլն: Ավելի լավ է՝ թող գեներալները մշակեն ռազմական գործողությունները, ցանկալի է՝ առանց Փաշինյանի մոդերացիայի»,-գրում է թերթը։

Նյութն ամբողջությամբ կարդացեք թերթի այսօրվա համարում։