Ավելի քան 120 պաշտոնաթող ամերիկացի գեներալ բաց նամակում կասկածի տակ է առել Բայդենի հոգեկան և ֆիզիկական վիճակը

Ավելի քան 120 պաշտոնաթող ամերիկացի գեներալ բաց նամակում կասկածի տակ է առել ԱՄՆ-ում 2020 թվականին անցկացված նախագահական ընտրությունների արդարությունը, ինչպես նաև ընտրված նախագահ Ջո Բայդենի հոգեկան և ֆիզիկական վիճակը:

Նամակը տեղադրվել է Flag Officers 4 America-ի (դրոշի սպաներ ԱՄՆ-ի համար,-խմբ.) պաշտոնական կայքում:

«ԱՄՆ զինված ուժերի գերագույն գլխավոր հրամանատարի՝ Ջո Բայդենի հոգեկան և ֆիզիկական վիճակը չի կարելի անտեսել: Նա պետք է կարողանա արագորեն ճշգրիտ որոշումներ կայացնել ազգային անվտանգության, այդ թվում՝ կյանքի և առողջության ոլորտում, ցանկացած վայրում, և՛ գիշերը, և՛ ցերեկը»,- ասված է նամակի տեքստում, որը ստորագրել է 124 նախկին ծովակալ և գեներալ:

Բացի այդ, նամակի հեղինակները բարձրացրել են 2020 թվականի նախագահական ընտրությունների արդյունքները կեղծելու հարցը: Նրանց կարծիքով, խախտումներ են տեղի ունեցել քաղաքացիների կամարտահայտման առնչությամբ:

«Առանց ազնիվ և արդար ընտրությունների, որոնք ճշգրտորեն արտացոլում են ժողովրդի կամքը, մեր սահմանադրական հանրապետությունը կորած է: ԱՄՆ հետաքննությունների դաշնային բյուրոն և գերագույն դատարանը պետք է արագ գործեն, երբ ընտրախախտումների են ականատես լինում, այլ ոչ թե անտեսեն դրանք, ինչպես արել են 2020 թվականին»,- ասված է նամակում:

Բացի այդ, պաշտոնաթող զինվորականները նշել են, որ ԱՄՆ նոր վարչակազմը «բռնապետորեն սկսել է լայնամասշտաբ հարձակվել Ամերիկայի քաղաքացիների սահմանադրական իրավունքների վրա՝ արագորեն ստորագրելով ավելի քան 50 գործադիր հրաման, որոնցից շատերը չեղակում են նախորդ վարչակազմի արդյունավետ քաղաքականությունը»:

Նամակի հեղինակները հայրենակիցներին կոչ են արել սատարել սոցիալիզմին, մարքսիզմին և առաջադեմությանը դեմ հանդես եկող քաղաքական գործիչներին և հատուկ ուշադրություն դարձնել բոլոր ամերիկացիներին, հատկապես միջին խավին, և «ոչ թե իրենց ներքին քաղաքականության շահերը խթանող խմբերին»: