Իրավաբանական խուճուճ հարցերը տվեք մեր իրավաբաններին, ես կարող եմ ասել՝ ինչով է տարբերվում Ստանիսլավսկու դպրոցը Չեխովի դպրոցից. իմքայլական Արթուր Մանուկյանը՝ Նիկոլ Փաշինյանի վարչապետի ժ/պ մնալու մասին
Իրավաբանները մեզ մոտ կարծես, թե մատնոց պտտեցնող են դարձել, չգիտես, թե ճշմարտությունը որտեղ է, բոլորը գիտեն, որ Սահմանադրությամբ այդպիսի հոդված կա, հետո ինչ-որ մեկի համար այդ հոդվածը հակասահմանադրական են դիտարկում: Ոնց որ անվանական իրավաբանություն լինի: Այս մասին այսօր Tert.am-ի հետ զրույցում ասաց ԱԺ «Իմ քայլը» խմբակցության պատգամավոր Արթուր Մանուկյանը՝ պատասխանելով հարցին, թե որ հոդվածով է, որ Նիկոլ Փաշինյանը վարչապետի պաշտոնից հրաժարվելուց հետո պետք է մնա պաշտոնակատար:
«Ես իրավաբան չեմ, բայց իմ տպավորությունն այսօրվա իրավաբանների և նրանց մեկնաբանությունների մասին այն է, որ շատ նման է Սովետի ժամանակ մատնոց պտտեցնողներին: Այս մեկնաբանություններն իրարամերժ են»,-ասաց նա:
Դիտարկմանը, թե 2018 թվականին այն նույն օրենքները, որոնք այսօր մասնագետները առաջ են բերում, առաջ էր բերում նաև Նիկոլ Փաշինյանը, երբ Սերժ Սարգսյանը հրաժարական տվեց ՀՀ վարչապետի պաշտոնից և հարցին, թե 2018 թվականին հնարավոր չէ՞ր վարչապետի ժամանակավոր պաշտոնակատար մնալ, բայց հիմա հնարավո՞ր է, պատգամավորն արձագանքեց. «Եկեք այս իրավաբանական խուճուճ հարցերը տվեք մեր խմբակցության իրավաբաններին, ես, օրինակ, կարող եմ ասել, թե ինչով է տարբերվում Ստանիսլավսկու դպրոցը Չեխովի դպրոցից»:
Դիտարկմանը, թե վերջինս ևս պատգամավոր է և պատրաստվում է նույն ճանապարհով ընտրության գնալ, Մանուկյանն արձագանքեց. «Ես պատգամավոր եմ, բայց դա չի նշանակում, որ ես իրավագետ եմ, սահմանադրագետ եմ, չի նշանակում, որ ես չեմ կարող մեկնաբանել Սահմանադրությունը, նույնիսկ որոշ շատ փորձառու իրավաբաններ Սահմանադրություն մեկնաբանելու համար դիմում են սահմանադրագետներին, Դուք եկել, ինձ նեղ, վտանգավոր հարց եք տալիս, որն ինձանից բացառիկ գիտելիքներ է պահանջում: Որ ասում եք՝ պատգամավոր եք, նշանակո՞ւմ է, որ բացի իրավաբաններից որևէ մեկը պատգամավոր լինել չի կարող»: