«ՌԴ-ին կոչ ենք անում հստակեցնել մտադրությունները». Պենտագոնն Ուկրաինայի սահմանի մոտ ռուսական զորքի կտրուկ աճ է արձանագրել

Ուկրաինայի սահմանի հարևանությամբ «օկուպացված» (չակերտները` Խմբ.) Ղրիմում ռուսական զորքերի թվաքանակը վերջին 2 շաբաթվա ընթացքում կտրուկ աճել է և գերազանցել է 2014 թվականին թերակղզին բռնակցած զորքերի թվին: Այս մասին հայտարարել է Պենտագոնի մամուլի քարտուղար Ջոն Քիրբին, գրում է nbcnews.com կայքը:

Քիրբին հրաժարվել է Ուկրաինայի սահմանին գտնվող ռուսական զորքերի հստակ թիվ նշել: Ուկրաինայի նախագահ Վլադիմիր Զելենսկիի խոսնակը նախորդ շաբաթ հայտարարել էր, որ տվյալ պահին Ռուսաստանի հետ երկրի սահմանի երկայնքով տեղակայված է շուրջ 80 000-անոց զորք, որից 40 000-ը` Ղրիմում: Երկուշաբթի Եվրամիությունը հայտարարել է, որ ներկայում սահմանամերձ շրջաններում կա ավելի քան 100 000-անոց զորք:

«Ընդհանուր առմամբ, ինչ կարող եմ ասել, այն է, որ մենք շարունակում ենք տեսնել այդ աճը, և դա կրկին մեզ անհանգստացնում է»,-ասել է Քիրբին:

«Հիմնականում, վերջին մի քանի շաբաթների ընթացքում մենք շարունակել ենք տեսնել օկուպացված Ղրիմում Ուկրաինայի հետ սահմանի երկայնքով ուժերի ավելացումը»,-ասել է նա:

ՌԴ պաշտպանության նախարար Սերգեյ Շոյգուն այս ամիս ավելի վաղ հայտարարել էր, որ զորքերի աճը այն վարժանքների մի մասն էր, որը իրականացվում էր պատասխան հասցնելու համար նրան, ինչը պաշտոնյան անվանել էր «սպառնալից գործողություններ ԱՄՆ-ի և ՆԱՏՕ-ի նրա գործընկերների կողմից»:

Քիրբիի խոսքով` զորքերի թվի աճը «զգալիորեն ավելին է», քան 2014 թվականին` թերակղզու բռնակցման ժամանակ:

«Մենք Ռուսաստանին կոչ ենք անում հստակեցնել իրենց մտադրությունները: Մենք չենք հավատում, որ այս կուտակումը նպաստում է Ուկրաինայի սահմանի երկայնքով անվտանգությանը և կայունությանը, հատկապես` օկուպացված Ղրիմում»,-ասել է Քիրբին:

«Մենք, անշուշտ, լսել ենք, որ ռուսները հայտարարում են, որ այս ամենը վարժանքների նպատակով է արվում: Մեզ համար այնքան էլ պարզ չէ, որ հենց դա է նպատակը»,-ավելացրել է նա: