Լուիզիանայում նավի շրջվելու հետևանքով 5 մարդ է զոհվել. կա 8 անհետ կորած (լուսանկարներ)

Ամերիկյան Լուիզիանա նահանգի ափերի մոտ նավի շրջվելու հետևանքով փրկարարները հայտնաբերել են 5 մարդու դի, 8 անհայտ կորածի որոնումը դադարեցվել է: Այս մասին տեղեկացրել է ԱՄՆ առափնյա պաշտպանությունը, գրում է «ՌԻԱ Նովոստի» գործակալությունը:

«Ցավոք, 5-ը հայտնաբերվել է մահացած, 8-ը համարվում է անհայտ կորած»,-ճեպազրույցի ժամանակ ասել է առափնյա պահպանության կապիտան Ուիլ Ուոթսոնը:

Հաղորդագրության մեջ առափնյա պահպանության աշխատակիցները հայտնել են, որ փրկարարներն ու կամավորները որոնել են անհայտ կորածներին 175 ժամ:

«Որոնումների դադարեցումն առափնյա անվտանգության ծառայության ամենաբարդ որոշումներից մեկն էր: Ես կցանկանայի խորին և անկեղծ ցավակցություն հայտնել բոլոր նրանց ընտանիքներին, ընկերներին և մտերիմներին, որոնք տուժել են այս ողբերգության պատճառով»,-ընդգծել է Ուոթսոնը:

Առափնյա պահպանությունն ապրիլի 13-ին ահազանգ է ստացել աղետի ենթարկված 39-մետրանոց առևտրական նավի մասին: Նավում եղել է 19 մարդ: Այդ ժամանակ առափնյա պահպանությունը հայտնել էր, որ Լուիզիանայի ափերի մոտ նավի շրջվելու հետևանքով 12 մարդ կորել է, 6 մարդու հաջողվել է փրկել: