Էլիզաբեթ 2-րդը հուղարկավորությունից առաջ առանձին հրաժեշտ կտա ամուսնուն․ Բուքինգհեմյան պալատը թագուհու ընտրությամբ հիշատակի լուսանկար է հրապարակել (լուսանկարներ)

Մեծ Բրիտանիայի թագուհի Էլիզաբեթ 2-րդն առանձին հրաժեշտ կտա հանգուցյալ ամուսնուն`արքայազն Ֆիլիպին, մինչ այսօրվա հուղարկավորությունը, ապա նրա դագաղը դուրս կբերվի Ուինձորի ամրոցից, հայտնում է բրիտանական Daily Mail պարբերականը։

Բուքինգհեմյան պալատը տարածել է թագուհու և հանգուցյալ ամուսնու՝ Էդինբուրգի դուքս արքայազն Ֆիլիպի նախկինում չհրապարակված լուսանկարներից մեկը, որում զույգն իր սիրելի վայրում է՝ Բալմորալին մոտ գտնվող բլուրներում։

Լուսանկարը, որն արվել է իրենց հարսի՝ Վեսեքսի կոմսուհու կողմից 2003 թվականի ընտանեկան արձակուրդի ժամանակ, այսօրվա հիշատակի հրապարակման համար ընտրվել է անձամբ թագուհու կողմից։

Դուքսի դագաղը այսօր դուրս կբերվի Վինձորի ամրոցի պետական մուտքից՝ տեղական ժամանակով 14։41-ին և Land Rover մակնիշի հատուկ ավտոմեքենայով, որը նախագծել է հենց ինքը՝ արքայազնը, կտեղափոխվի Սուրբ Ջորջ մատուռ։

Ինչպես ավելի վաղ տեղեկացրել էր Tert.am-ը, հանգուցյալ արքայազնի դագաղը ծածկված է լինելու իր անձնական դրոշով։ Դրոշը բաղկացած է 4 մասից․ վերևի ձախ անկյունը դեղին ֆոն է՝ կարմիր սրտերով և կապույտ վիշապներով, որոնք ներկայացնում են Դանիայի զինանշանը: Վերին աջ անկյունում Հունաստանի ազգային դրոշի սպիտակ խաչն է: Ներքևի ձախ կողմում` սև և սպիտակ ուղղահայաց շերտեր, որոնք ներկայացնում են Մաունթբաթեն ընտանիքը, իսկ աջ կողմում` Էդինբուրգը ներկայացնող դղյակ` ի պատիվ Էդինբուրգի դուքսի իր տիտղոսի:

Սուրբ Ջորջի մատուռում, բարձերի վրա կցուցադրվեն նաև Ֆիլիպի մեդալներն ու ռազմական պարգևները:

Արարողության ավարտից հետո Էդինբուրգի դուքսին կտեղափոխեն արքայական դամբարան։

Բացի այդ արքայազն Ֆիլիպի թաղման արարողության ժամանակ հնչելու է կրակահերթ և հայտարարվելու է ազգային լռության րոպե։

Հուղարկավորության արարողությանը մասնակցելու է 30 մարդ, ինչը պայմանավորված է կորոնավիրուսային վարակի տարածման դեմ կիրառված սահմանափակումներով։ Թագուհին թափորի վերջում կլինի՝ Land Rover մակնիշի մեքենայով։ Հայտնի է, որ 30 անձանց շարքում չէ Մեծ Բրտանիայի վարչապետ Բորիս Ջոնսոնը, որպեսզի ընտանիքի անդամները կարողանան մասնակցել արարողությանը։ Բոլոր ներկաները լինելու են դիմակներով և քայլելու են սոցիալական հեռավորությամբ։

Ինչպես ավելի վաղ տեղեկացրել է Tert.am-ը, Մեծ Բրիտանիայի թագուհի Էլիզաբեթ 2-րդը որոշում է ընդունել, որ Էդինբուրգի դուքս արքայազն Ֆիլիպի հուղարկավորության արարողության ժամանակ թագավորական ընտանիքի տղամարդիկ զինվորական համազգեստ չեն կրելու։ Daily Mail պարբերականը պարզել է, որ նման որոշում կայացվել է վերջին պահին՝ արարողության ժամանակ ընտանեկան միասնական ճակատ ներկայացնելու նպատակով։

Հիշեցնենք, որ արքայազն Հարիին չէր թույլատրվել կրել իր զինվորական համազգեստը, քանի որ վերջինս սեփական կամքով վայր է դրել թագավորական ընտանիքի ավագ անդամի լիազորությունները, ինչը սկանդալի առիթ էր դարձել։

Բրիտանական պարբերականը նշել է, որ արքայազն Հարիի` հուղարկավորման արարողությանը ռազմական համազգեստով (նա այդ համազգեստով է պսակադրվել) ներկայանալու ցանկությունը միանգամայն հասկանալի է, սակայն նրան թույլատրվել է միայն կոստյում կրել՝ իր ծառայության համար և թագուհու կողմից ստացած շքանշաններով։

Աղբյուրներից մեկի համաձայն` թագուհին որոշում է կայացրել, որ ընտանեկան միասնությունը պահպանելու և Հարիին ցանկացած հասարակական նվաստացումից հետ պահելու համար բոլորը նույն կերպ են հագնվելու` տղամարդիկ վերարկուներ և սև փողկապներ, իսկ կանայք` հասարակ սև զգեստներ:

Սա վերջին 100 տարվա ընթացքում 2-րդ դեպքն է, երբ միապետի կամ նրա կողակցի հուղարկավորությանը թագավորական ընտանիքի անդամները զինվորական համազգեստ չեն կրում։

Հիշեցնենք՝ արքայազնի մահվան մասին թագավորական ընտանիքը հայտնել է իր թվիթերյան էջում․ «Խոր ցավով Նորին Մեծություն թագուհին տեղեկացրել է իր սիրելի ամուսնու՝ Էդինբուրգի դուքսի մահվան մասին: Նորին թագավորական մեծությունը կյանքից խաղաղ հեռացել է այսօր առավոտյան` Վինձորի ամրոցում»։

Արքայազնը մահացել է 99 տարեկանում։

Արքայազն Ֆիլիպը Մեծ Բրիտանիայի պատմության մեջ միապետի ամենաերկարակյաց կողակիցն է:

Զույգն ամուսնացել է 1947 թվականին, երբ թագուհին ընդհամենը 21 տարեկան էր, իսկ արքայազնը թագավորական նավատորմի սպա էր, ով սերում էր հունական և դանիական թագավորական ընտանիքներից։ Այսպիսով Ֆիլիպ Մաունթբաթենը դարձել է Էդինբուրդի դուքս արքայազն Ֆիլիպ։

Արքայազնի սգո հանդիսավոր արարողությանը հրավիրած անձանց ցուցակը ներառում է 30 մարդ: Ապրիլի 17-ին 14:40-ին (Երեւանի ժամանակով 17:40-ին) արքայազն Ֆիլիպի դին դուրս կբերվի Վինձորի դղյակից: Թափորը՝ Գվարդիական գրենադերական գնդի նվագախմբի գլխավորությամբ, որի գնդապետը 42 տարի եղել է արքայազն Ֆիլիպը, կուղևորվի Սուրբ Ջորջի մատուռի կողմը:

Դագաղի հետևից կանցնեն դուքսի բոլոր չորս զավակները՝ արքայազն Չարլզը, Էնդրյուն, Էդվարդը և արքայադուստր Աննան, ինչպես նաև նրա թոռները՝ արքայազն Ուիլյամը և Հարրին: Հուղարկավորությունը տեղի կունենա Վինձորի դղյակի տարածքում:

Կորոնավիրուսի պատճառով սգո արարողության մասնակիցների առավելագույն թիվը սահմանափակվել է 30-ով: Բացի Էլիզաբեթ Երկրորդ թագուհուց, երեխաներից և թոռներից, արարողությանը ներկա կլինեն թագուհու զարմիկները, ինչպես նաև արքայազն Ֆիլիպի ազգականները, այդ թվում՝ Բադենի գահաժառանգ արքայազն Բեռնհարդը և այլք: Արարողության ավարտից հետո Էդինբուրգի դուքսի դին կիջեցնեն թագավորական դամբարան: Քենթերբերիի արքեպիսկոպոսը հոգեհանգստյան աղոթք կկարդա, և երգչախումբը կերգի Ազգային հիմնը: Պալատը սգո հանդիսավոր արարողության կարգը նաև կհրապարակի պալատի կայքով: Հուղարկավորությունն ուղիղ եթերով կհեռարձակվի հեռուստատեսությամբ և ռադիոյով: