Գերիների ու անհետ կորածների խեղճ ծնողներին ոչ թե ծաղրում են, այլ տանջում․ Արտակ Թովմասյան

Առաջնահերթ հարցն այն է, թե որքանով են անհրաժեշտ արտահերթ խորհրդարանական ընտրությունները, ես ինքս դրանց անհրաժեշտությունը չեմ տեսնում․ մենք պետք է տարբերակենք արտահերթ ընտրությունները վարչապետի հրաժարականից, դրանք մեկը մյուսի հետ կապված չեն։ Այս մասին Armdaily.am-ի հետ զրույցում ասել է «3-րդ ուժ» քաղաքացիական նախաձեռնության անդամ, «Թովմասյան» հիմնադրամի նախագահ Արտակ Թովմասյանը։

«Վարչապետը կարող է հրաժարական տալ, եւ ոչ թե կարող է, այլ անհրաժեշտ է․ այս կառավարության պատճառով է երկիրը հայտնվել այս վիճակում։ Բայց արտահերթ ընտրության կարիքը ես չեմ տեսնում, որովհետեւ եթե հաշվի առնենք ներքաղաքական, հատկապես տարածաշրջանային զարգացումները, կտեսնենք, որ դրա անհրաժեշտությունը չկա։ Դա շատ տագնապալի կարող է լինել մեր երկրի համար եւ հանգեցնել նոր կորուստների», ասել է Ա․Թովմասյանը։

Արտակ Թովմասյանը հիշեցրել է իր առաջարկի մասին․ կազմավորել ժամանակավոր կամ հակաճգնաժամային կառավարություն։ Նոր ընտրությունների համար, ըստ նրա, անհրաժեշտ են Սահմանադրության եւ ընտրական օրենսգրքի փոփոխություններ, այդ հարցում շտապել պետք չէր։

«6 ամսով կամ 1 տարով կկառավարեն հակաճգնաժամային կառավարիչները, որոնք կընդունեն այդ փոփոխությունները, այս տարվա վերջում կամ հաջորդ տարվա սկզբին կանցկացնենք ընտրություններ, որոնց արդյունքում էլ 5 տարով կառավարող ուժը կկայունացնի երկիրը։ Իսկ հունիսի 20-ին ընտրություն անցկացնելու դեպքում կունենանք ոչ կայուն երկիր եւ ոչ մի զարգացում չենք ունենա, երկու տարվա ընթացքում կունենանք նոր ճգնաժամեր եւ նոր ընտրություններ։ Այդ փորձը ես տեսել եմ Մոլդովայում, Ուկրաինայում, մինչեւ հիմա կայունություն եւ զարգացում չկա», ասել է Արտակ Թովմասյանը։

Արտահերթին մասնակցել Ա․Թովմասյանի նախաձեռնած քաղաքական շարժումը դեռ չի ծրագրում մասնակցել։

«Մենք նախաձեռնել ենք «3-րդ ուժը», որը ոչ հին է, ոչ՝ նոր, ոչ սեւ է, ոչ էլ՝ սպիտակ, ցանկանում ենք համախմբել հասարակության առողջ ուժերը, որոնք կարող են այցելել մեզ, շփվել, հասկանալ, թե ինչպես կարող ենք համատեղ ուժերով լուծել երկրի առջեւ ծառացած խնդիրները։ Մենք նախաձեռնել ենք կուսակցության անվանափոխություն եւ գրանցում, անունը կլինի «Ազգային զարգացման գործընթաց», եւ երբ պաշտոնապես հայտարարվեն արտահերթ ընտրությունների մասին, այդ ժամանակ էլ կորոշենք՝ մասնակցել դրանց, թե՝ ոչ», ասել է նա։

Վարչապետի հրաժարականին հասնելու համար, Ա․Թովմասյանի խոսքով, իրենք նախաձեռնում են կոնկրետ քայլեր․ ձեւավորել են «Ազգային անվտանգության խորհուրդ», որտեղ ընդգրկվել են ԱԱԾ, ԱԻՆ, ոստիկանության, ԶՈւ նախկին սպաներ, հանրությանը եւ պետական մարմիններին ներկայացրել այլընտրանքային առաջարկներ, արձագանքներ դեռ չկան։

«Մենք առաջնահերթը համարում ենք անվտանգության հարցերը։ Մենք հուշում ենք, թե ինչ է պետք անել։ Չեմ բացառում այս իշխանության հետ գործակցությունը։ Գերիներին ես չեմ տարբերում իմ երեխայից, պետք է մեր սահմանները լինեն պաշտպանված, Գորիս գնալու դեպքում կարող են գերի ընկնել, եւ ոչժրպեսզի այդպիսի դեպքեր չլինեն՝ պատրաստ ենք օգնել, մենք չենք ուրախանում նրանց անհաջողություններով։ Մենք համարում ենք, որ մեր երկրին պարտված բանակցող պետք չէ։ Պետք չէ այն ղեկվարը, որը շփոթում է Ֆրանսիայի նախագահի անունը Ռուսաստանի նախագահի հետ, որը Ադրբեջանի նախագահի՝ Հայաստանին վերաբերող բոլոր անպատվիվ խոսքերին չեն արձագանքում, մեզ պետք չէ», ասել է նա։

Ըստ Ա․Թովմասյանի՝ պետք էր հրաժարակել անհետ կորածների եւ գերիների թվերը, հաշվառել, որպեսզի մարդիկ իմանան՝ գերի՞ են, թե անհետ կորած կամ զոհված, այլ ոչ թե ժամանակ առ ժամանակ ծնողներին հանձնել իրենց զավակների դիերը, ընդ որում, միանգամից չեն հանձնում, ըստ երեւույթին, ցնցումներից խուսափելու համար, քանի՞ այսպիսի մարդու են խաբել։ Թվերը պետք է իմանալ, որպեսզի այդ ուղղությամբ աշխատելուց հասկանալի լինի, որ եթե, ասենք, 50 հոգի հաջողվի բերել, պարզ լինի, թե որքան մարդ մնաց գերության մեջ։

Ռուս խաղաղապահների հրամանատար, գեներալ Մուրադովին առնչվող միջադեպի կապակցությամբ, Արտակ Թովմասյանն ասել է, որ Մուրադովը սպա է, որը գիտի ինչ է սպայի պատիվը, իսկ մեր իշխանությունները սովոր են գործել Ֆեյսբուքում, որին Մուրադովը չի հետեւում, տարբերությունն, ըստ նրա դրանում է, որ իշխանությունները զբաղվում են պոպուլիզմով եւ խաբում են ծնողներին, մոլորության մեջ գցում նրանց՝ իրենցից կախվածության մեջ պահելու, իրենց իշխանությունը երկարաձգելու համար։

«Դա սրբապղծություն է, չի կարելի այդպիսի բաներ անել։ Այս ծնողների զգալի մասն ուզում է ունենալ իր զավակի գերեզմանը։ Հիմա հարց եմ տալիս՝ կես տարվա ընթացում դժվար է՞ր կազմակերպել, գնալ, գտնել, բերել զոհվածներին, հանձնել ծնողներին։ Այդ խեղճ ծնողների վրա ոչ թե ծիծաղում են, ծաղրում են, այլ տանջում են նրանց։ Նրանք առավոտյան 8-ից հավաքվում են, գնում որոնում են, առանց հաց ուտելու, մեկ օր սպասում են մուտքերի մոտ», նշել է նա։ Ա․Թովմասյանը հերքել է տարածվող լուրերը, թե ինքն ուղղորդում է այդ ծնողներին, նշել, որ ինքը միայն օգնում է նրանց՝ ինչով կարողանում է։

Որպես «Դվին» հյուրանոցի սեփականատեր, Ա․Թովմասյանն ասել է, որ ինքը մենեջերը չէ, եւ ի պատասխան հարցի, նշել է, թե չի կարող ասել Աննա Հակոբյանը, որն իր հիմնադրամի միջոցառումներն այնտեղ էր անցկացնում, հիմա՞ էլ է նախընտրում այնտեղ անել, թե՝ ոչ։ Նա հերքել է նաեւ խոսակցությունները, թե Հայ ազգային կոնգրեսը ցանկացել է այնտեղ համագումար անել, բայց իրենց թույլ չեն տվել քաղաքական նկատառումներով․ պարզապես այդ օրերին դահլիճը զբաղված է լինելու՝ համերգ, որը նախապես է ծրագրված եղել, կարող են ուրիշ օրերի գալ։

Իրականությանը չեն համապատասխանում նաեւ լուրերը, թե իր ղեկավարած հիմնադրամը փողեր է փոխանցել Աննա Հակոբյանի հիմնադրամներին։

Իր անունը Ռոբերտ Քոչարյանի անվան հետ կապելու մասին խոսակցությունների առնչությամբ, Ա․Թովմասյանը նշել է, որ ակտիվ ներդրող լինելով, ծանոթ է եւ Ռոբերտ Քոչարյանի, եւ Սերժ Սարգսյանի հետ, եւ ինչպես Փաշինյանն է գնում համայնքների հետ հանդիպումների եւ ներդրումների կոչ անում, նրանք էլ են հանդիպել եւ կոչ արել, եւ ինքը հպարտ է, որ Հայաստանի համար օգակար բաներ է արել։ Մենք ոչ մեկի հետ վարագույրի հետեւում պայմանավորվածություններ չունենք, ասել է նա։

Վտանգի տակ է ոչ միայն Արցախ, այլեւ Հայաստանի հարավը, համոզված է Ա․Թովմասյանը․

«Դրա համար էլ ասում ենք, որ կառավարությունն օր առաջ պետքէ հրաժարական տա։ Արցախի հարցի լուծման համար պետք է ունենայինք ուժեղ, կանոնակարգված թիմ, որը կտաներ հստակ բանակցություններ։ Ամեն տարի Ադրբեջանը տանում էր կոնկրետ աշխատանք միջազգային հարթակներում, որ Հայաստանը օկուպացրել է Ադրբեջանի տարածքները, 5+2-ը միջազգային հանրությունը համարում էր ադրբեջանական։ Հայաստանը համաձայնում էր, ասելով, որ դա կարող է լինել Արցախի անկախությունը ճանաչելու դիմաց։ Հիմա մենք կորցրել ենք այդ 7 շրջանները, նաեւ Հադրութն ու Շուշին։ Պետք է սկսվի գործընթաց՝ այս վերջինները վերադարձնելու համար, բայց իշխանություններն այդ ուղղությամբ ոչինչ չի անում», նշել է նա։