Հենց Փաշինյանն ու իր թիմը տեսնեն, թե տո­կոսային առումով որքան է իրենց նե­րուժն այսօր Հայաստանում, ամեն ինչ կանեն, որ խուսափեն ընտրություննե­րից․ Վահե Հակոբյան. «Հրապարակ»

«Հրապարակը» զրուցել է «Վերածնվող Հայաստան» կուսակցության նախագահ, Սյունիքի նախկին մարզպետ Վահե Հակոբյանի հետ։

Ներկայացնում ենք հատված․

-Պարո՛ն Հակոբյան, Ձեր կուսակցությունն արդեն գրանցե՞լ եք, թե՞ գրանցված կուսակցություննե­րից մեկն եք վերցրել և ռեբրենդինգ արել:

-Վաղուց կար մեր կուսակ­ցությունը գրանցված, պարզապես անվանումը փոխեցինք, որպեսզի ավելի համահունչ լինի այսօրվա իրա­կանության հետ:

- Ի՞նչ ֆորմատով եք մասնակցե­լու ընտրություններին, մամուլում երկու օր է՝ գրվում է, որ Քոչարյանի մատնանշած երկու ուժերից մեկը, հնարավոր է՝ դուք լինեք:

-Քանի որ դեռ չկա հստակեցում, թե երբ են լինելու այդ ընտրություննե­րը, քանի որ Նիկոլի գրառումն իր ֆեյսբուքյան էջում դեռ չի նշանակում, որ մենք գնում ենք ընտրության: Երբ որ կլինի հստակեցում, էդ ժամանակ էլ կհասկանանք, թե ինչ ֆորմատով ենք գնում:

-Դուք և ընդդիմության Ձեր շատ գործընկերներ միաժամանակ ասում եք, որ վստահ չեք՝ ընտրու­թյուններ կլինե՞ն, թե՞ Նիկոլ Փաշինյանը հերթական անգամ կխաբի բոլորին, մյուս կողմից ակտիվ նա­խընտրական եռուզեռի մեջ են այդ նույն ընդդիմադիր ուժերը:

-Ես կարծում եմ, որ Նիկոլն իր թիմով պատրաստվում է, համենայնդեպս, ընտրությունների, իրենք հիմա փորձում են հասկանալ իրենց ուժերը, միջոցները և վերածեն տո­կոսային միավորի, թե ինչքան դա կստացվի, և ես համոզված եմ, որ հենց իրենք հստակ տեսնեն, թե տո­կոսային առումով որքան է իրենց նե­րուժն այսօր Հայաստանում, ամեն ինչ կանեն, որ խուսափեն ընտրություննե­րից:

-Իսկ Դուք ի՞նչ եք անելու այդ դեպքում:

-Այդ դեպքում, ես կարծում եմ, պետք է այս պայքարը տրանսֆորմա­ցիա լինի այլ ձևաչափի, ես կարծում եմ՝ պետք է ժողովուրդը նորից դուրս գա փողոց, բայց արդեն՝ ոչ 30-40 հազարով, այլ շատ ավելի շատ մարդկանցով միտինգներ պետք է լի­նեն:

-Փորձենք հստակեցնել. Դուք չեք հերքել, որ հնարավոր է Քոչարյանի հետ դաշինքով հանդես գաք Դուք և ՀՅԴ-ն, այսինքն՝ Քոչարյանի մատնանշած այդ երկու ուժերի մեջ Դուք էլ լինեք:

-Մենք չենք բացառում առողջ ուժերի հետ համագործակցություն՝ դաշինքի տեսքով, եթե նրանց օրա­կարգում առաջին և գլխավոր խնդիրն է Նիկոլի հեռանալը:

-Իսկ ինչո՞ւ ոչ ՀՀԿ-ի հետ, նրանց օրակարգում էլ է Նիկոլի հեռանա­լը, Դուք էլ Սերժ Սարգսյանի օրոք եք մարզպետ եղել, ինչո՞ւ ոչ Արթուր Վանեցյանի կամ Միքայել Մինասյանի հետ, որոնց հետ ընկերական հարաբերություններ ունեք:

-Այո, Ձեր բոլոր թվարկած մարդկանց օրակարգում կա Նիկոլի հեռանալը, բայց հոգեհարազատ չէ, էսպես ձևակերպեմ, մոտեցումները Ձեր մատնանշած մարդկանց: Մենք, էսպես ասած, շտապում ենք, լավ առումով եմ ասում, մենք շտապում ենք վայրկյան առաջ Նիկոլից ազատվել:

-Հնարավո՞ր է բոլորիդ մի դաշինքում տեսնենք:

-Ռեալ եթե խոսենք՝ չեմ կարծում: Ոչինչ բացառված չէ, բայց մի քիչ տարբեր են, էլի, բևեռները:

-Դուք ընդդիմադիր ուժերով ունե՞ք մշակած մարտավարություն, թե ինչպես եք պայքարելու Փաշինյանի դեմ, և չե՞ք կարծում, որ տարբեր թևեր ձևավորելով, ապա­կենտրոն պայքար մղելը նաև ձեր դեմ կաշխատի՝ կփոշիացնեք մեկդ մյուսի ձայները, իրարից ձայն կխլեք:

-Ես չեմ կարծում, որ ապակենտրո­նացված կլինի պայքարը, կոնկրետ իմ կարծիքով՝ մեր քարոզարշավը պետք է ուղղված լինի ոչ թե նրան, թե մենք ինչքան լավն ենք, այլ մենք պիտի մատնանշենք Նիկոլի թերություննե­րը: Ու քանի որ ինքն ամբողջովին թերություններից է կազմված, պետք է հակաքարոզչություն բրդենք առաջ:

-Թեև բոլորիդ նպատակն իշխանության գալն է, բայց չի բա­ցառվում, որ դուք փոքր տոկոսով անցնեք խորհրդարան, չկարողա­նաք կոալիցիա ձևավորել ու գաք իշխանության: Ի՞նչ եք անելու այդ դեպքում, գնալու եք Նիկոլ Փաշինյանի իշխանության պայմաններում ընդդիմությո՞ւն աշխատեք:

-Ես բացառում եմ, որ Նիկոլ Փաշինյանը կհավաքի բավականին ձայներ, որ վերընտրվի: Ես պարզա­պես բացառում եմ, և դա, ինձ թվում է, իրենք էլ են պատկերացնում: Իսկ եթե ինքը չհավաքի մեծամասնություն, կունենա իր հետևից շարունակական ու աճող խնդիրներ։

Նյութն ամբողջությամբ կարդացեք թերթի այսօրվա համարում: