«Հնդկաստանն ու Չինաստանը պետք է Լադախի հակամարտությունը լուծեն միասին՝ առանց արտաքին միջամտության». Լավրով

Ռուսաստանի Դաշնության արտգործնախարար Սերգեյ Լավրովը հայտարարել է, որ Հնդկաստանն ու Չինաստանը պետք է միասին լուծեն Լադախի հակամարտությունը՝ առանց արտաքին միջամտության, հայտնում է «ՌԻԱ Նովոստի» լրատվական գործակալությունը:

«Մենք ուշադիր հետևում ենք Հնդկաստանի և Չինաստանի միջև սահմանային իրավիճակի կարգավորման գործընթացին և ողջունում ենք փետրվարի 25-ին Հնդկաստանի և Չինաստանի արտաքին գործերի նախարարների միջև՝ իրավիճակի կարգավորմանն ուղղված հեռախոսազրույցի արդյունքները», - ասել է Լավրովը։

Լավրովն ասել է, որ Ռուսաստանը բարձր է գնահատում կողմերի ցուցաբերած կառուցողական վերաբերմունքը և հավելել․ «Մենք հարգում ենք Նյու Դելիի և Պեկինի՝ այս ոլորտում ձևավորած երկկողմ երկխոսության բազմամակարդակ մեխանիզմների շրջանակում ինքնուրույն գործելու ցանկությունը՝ առանց արտաքին ուժերի միջամտության: Հուսով ենք, որ երկու պետությունները, որպես միջազգային հանրության պատասխանատու անդամներ, կկարողանան փոխընդունելի քաղաքական և դիվանագիտական ուղիներ գտնել՝ առկա տարաձայնությունները արագ հաղթահարելու համար»:

Լադախի սահմանային շրջանում իրավիճակը սրվել է 2020 թվականի մայիսին, երբ Պանգոնգ լճի տարածքում տեղի են ունեցել մի շարք բախումներ Հնդկաստանի և Չինաստանի զինված ուժերի միջև, որից հետո երկու երկրներն էլ ամրապնդել են իրենց ռազմական ներկայությունը տարածաշրջանում: Փետրվարի սկզբին նախ չինացիները, այնուհետև Հնդկաստանի պաշտպանության նախարարությունը հայտարարեցին Պանգոնգ լճի հյուսիսային և հարավային ափերի երկայնքով ուժերի դուրսբերման մասին: Ապամոնտաժվել են նաև Պանգոնգի հատվածում անցյալ տարվա բախումներից հետո կառուցված ռազմական հենակետերը:

Հիշեցնենք, որ Հիմալայներում ասիական մրցակից գերտերությունների միջև վերջին տասնամյակներում ամենավտանգավոր դիմակայության ֆոնին Հնդկաստանն ու Չինաստանը հրետանու, զրահատեխնիկայի և ավելի քան 100 000 զինծառայողի միջոցով ամրացրել էին իրենց սահմանները։ Այն պայմաններում, երբ հազարավոր չինացի զինվորներ տեղակայված էին հնդկական տարածքում, իսկ հակամարտության կարգավորման շուրջ բանակցությունները փակուղի էին մտել, աշխարհի երկու խոշորագույն բանակները միմյանց դիմակայում էին հինգ հազար մետր բարձրության վրա և Ցելսիուսի սանդղակով՝ մինչև 40 աստիճան հասնող ցրտի պայմաններում։