«Պատվի հարց է. լռում եմ և լռելու եմ». Պոզներն առաջին անգամ խոսել է Թբիլիսում տեղի ունեցած միջադեպի մասին

Ռուսաստանցի հայտնի լրագրող Վլադիմիր Պոզները մեկնաբանել է բողոքի ակցիաները, որոնք բռնկվել են իր՝ Թբիլիսի կատարած այցի պատճառով:

Այս մասին նա գրել է Познер Online կայքում:

Նա բացատրել է, թե ինչու չի համաձայնել մեկնաբանել միջադեպը ոչ մի լրատվամիջոցի հետ զրույցում:

«Ինձ թվում է, որ բացատրությունն ակնհայտ է. այն մարդիկ, որոնք կազմակերպել են այս խառնաշփոթը, արժանի չեն ուշադրության: Պատվի հարց է: Այդ պատճառով ես լռում եմ և լռելու եմ», - գրել է Պոզները:

Հիշեցնենք՝ նախօրեին Պոզները մեկնել էր Թբիլիսի իր ծննդյան օրը նշելու նպատակով, բայց ստիպված էր եղել վերադառնալ Մոսկվա: Պատճառն այն է, որ քաղաքի բնակիչները դուրս էին եկել փողոցներ՝ պահանջելով, որ նա անմիջապես լքի Վրաստանը:

Բողոքի ակցիայի մասնակիցների խոսքով՝ լրագրողը չի ճանաչում Վրաստանի տարածքային ամբողջականությունը:

Նշենք՝ ավելի վաղ լրագրողը հայտարարել էր, որ Աբխազիան երբեք չի լինի Վրաստանի կազմում:

Ինչպես ավելի վաղ տեղեկացրել էինք, Պոզները, 87-ամյակը նշելու նպատակով, Թբիլիսի էր ժամանել չարտերային չվերթով, նրա հետ ժամանել է 50 մարդ՝ լրագրողի ընկերներն ու գործընկերները: Միջոցառման կազմակերպիչը եղել է երգչուհի Միրանդա Միրիանաշվիլին՝ ռուս գործարար Լեոնիդ Օգարյովի կինը:

Չորեքշաբթի երեկոյան Թբիլիսիում բողոքի ակցիաներ էին կազմակերպվել լրագրողի այցի պատճառով: Ցուցարարները պնդել են՝ քանի որ Պոզները չի ճանաչում երկրի տարածքային ամբողջականությունը, ապա նրա ներկայությունն անընդունելի է։

Նրանք շրջապատել են հյուրանոցը, կարողացել են անջատել հյուրանոցի էլեկտրամատակարարումը, ինչպես նաև ձվեր են նետել։

Դեպքից հետո հեռուստահաղորդավարն ու նրա ընկերները ոստիկանության ուղեկցությամբ դուրս են եկել հյուրանոցի շենքից, ցուցարարները նրանց ուղեկցել են օդանավակայան, այնուհետև, համոզվելով, որ ռուս այցելուները լքել են երկիրը, հեռացել են։

«Ռուս լրագրող Պոզները և նրա հյուրերը լքել են Վրաստանը։ Ինքնաթիռը թռել է Թբիլիսիի միջազգային օդանավակայանից։ Օդանավակայանում մոբիլիզացվել են իրավապահ մարմինների աշխատակիցները։ Կային նաև ցուցարարներ»,- տեղեկացրել է վրացական «Առաջին ալիք»-ը։

Միևնույն ժամանակ, բողոքի ակցիայից զատ, Վրաստանում աշխատանքային տեսչությունը հայտարարել է, որ հյուրանոցը, Պոզներին և նրա հյուրերին ընթրիք մատուցելով, խախտել է Վրաստանում երեկոյան 9-ից գործող «պարետային ժամը» և հյուրանոցին տուգանել է 10 հազար լարիով:

Առայժմ պարզ չէ՝ Վրաստանում գործող սահմանափակումները խախտելու համար կտուգանվի՞ արդյոք Պոզները, թե՞ ոչ։