Ադրբեջանի ականազերծման գործակալությունը հայտարարություն է արել Շուշիում հայտնաբերված «Իսկանդեր»-ի բեկորների վերաբերյալ

Դեռևս անհայտ է, թե Շուշիում հայտնաբերված հրթիռների բեկորները ինչ տեսակի «Իսկանդեր» համազարկային կրակի ռեակտիվ համակարգերից են արձակվել: Այս մասին հայտարարել է Ադրբեջանի ականազերծման գործակալության օպերատիվ շտաբի պետ Իդրիս Իսմայիլովը, գրում է minval.az կայքը:

Նա նշել է, որ «Իսկանդեր»-ի բեկորները հայտնաբերվել են Շուշի քաղաքի երկու տարածքներում:

«Փորձագետների կողմից տարածքում բեկորների զննման ընթացքում հայտնաբերվել է 9M723 հրթիռը, ինչը «Իսկանդեր»-ի ծածկագրային անվանումն է: Հրթիռի երկարությունը 7 մետր 23 սմ է, տրամագիծը ՝ 920 մմ: Ինչպես գիտեք, այս հրթիռի մի քանի տեսակ կա: Հրթիռների բեկորների վրա չի հայտնաբերվել որևէ գրություն, որը հնարավորություն կտար հստակեցնել մոդելները: Ներկայում հստակեցնում են, թե հրթիռը որ տեսակին է պատկանում»,-ասել է նա:

«Եթե հրթիռների հետ կապված որևէ ծածկագիր կամ արձանագրություն գտնվի, այդ մասին լրացուցիչ կտեղեկացվի: Այդ ժամանակ պարզ կդառնա, թե ինչ տեսակի է համազարկային կրակի ռեակտիվ համակարգը: Հրթիռային շարժիչի մասերի որոնումը շարունակվում է: Դրանց հայտնաբերումից հետո պաշտոնապես կապացուցվի, որ Հայաստանը 2 հրթիռ է արձակել»,-ասել է Իսմայիլովը` ավելացնելով, որ հատուկ ռադարների միջոցով հնարավոր է պարզել, թե Հայաստանի որ կետից են հրթիռները արձակվել:

Ավելի վաղ հաղորդվել էր, որ Բաքվում՝ «Ազերլենդշաֆտ» ԲԲԸ-ի տարածքում, Ադրբեջանի Ականազերծման գործողությունների գործակալության (ANAMA) ներկայացուցիչները ցուցադրել են «Իսկանդեր» հրթիռների բեկորները, որոնք, ըստ ադրբեջանական կողմի պնդման, Հայաստանն Արցախյան պատերազմում օգտագործել է Ադրբեջանի դեմ:

2020 թվականի դեկտեմբերից Ադրբեջանի ականազերծման գործակալությունը վնասազերծում է ականներն ու զինամթերքը Շուշիում: «Իսկանդեր» հրթիռների բեկորները հայտնաբերվել են մարտի 15-ին Շուշիում գործակալության կողմից տարածքի ականներից և չպայթած զինամթերքից մաքրելու գործողության ընթացքում:

Ավելի վաղ Բաքուն հայտարարել էր, որ 44-օրյա պատերազմի ընթացքում Հայաստանը Ադրբեջանի դեմ կիրառել է «Իսկանդեր» հրթիռային համակարգեր: Այս մասին հայտարարել էր Ականազերծման գործողությունների գործակալությունը:

Այս տարվա մարտի 15-ին քաղաքում տարածքների մաքրման գործողության ընթացքում հայտնաբերվել են երկու պայթած հրթիռի բեկորներ:

«Հրթիռի բեկորների աշխարհագրական կոորդինատները հետևյալն են. 39 ° 45'38.10" N 46 ° 44'33.90 "E և 39 ° 45'27.80" N 46 ° 45'25.80 "E: Գործակալության մասնագետների կողմից հրթիռի նույնականացման համարի (9M723) ստուգման ընթացքում պարզվել է, որ դրա բեկորները պատկանում են «Իսկանդեր» հրթիռային համալիրին: Նույնիսկ բաց ինտերնետային ռեսուրսներում որոնելիս կարելի է պարզել, որ 9M723 նույնականացման համարը պատկանում է «Իսկանդեր» հրթիռին», - ասված է հայտարարության մեջ:

Գործակալությունում ընդգծել են, որ այս ամենը հաստատում է, որ Շուշի քաղաքի ուղղությամբ Հայաստանն Ադրբեջանի դեմ օգտագործել է «Իսկանդեր»ներ: