ԱՄՆ-ն Եվրոպայում զորքերը հասցրել է առավելագույն պատրաստության՝ Ուկրաինայի հետ սահմանի մոտ ռուսական զորքերի կենտրոնացման ֆոնին. The New York Times

ԱՄՆ-ն Եվրոպայում իր զորքերը հասցրել է առավելագույն մարտական պատրաստության, ինչը կապված է ռուսական զորքերի՝ Ուկրաինայի սահմանի մոտ կենտրոնացման հետ, հայտնում է The New York Times-ը:

Նշվում է՝ եվրոպական ռազմական հենակետերում ԱՄՆ ուժերի պատրաստության կարգավիճակը «հնարավոր ճգնաժամից» փոփոխվել է «հավանական մոտալուտ ճգնաժամի», քանի որ նոր ռազմական գործողությունները և սահմանամերձ շրջանում ռուսական բանակի ակտիվացումը Բրյուսելում և Վաշինգտոնում գրավել են բարձրաստիճան պաշտոնյաների ուշադրությունը:

Արդեն երկրորդ ամիսն է, ինչ իրավիճակի սրումն օր-օրի ավելանում է: Դա ուղեկցվում է Կիևի և չճանաչված Դոնեցկի Ժողովրդական Հանրապետության, Լուգանսկի Ժողովրդական Հանրապետության փոխադարձ սադրիչ մեղադրանքներով, որոնց նպատակն է վերսկսել լայնամասշտաբ ռազմական գործողությունները: Վերջին ամիսների ընթացքում առաջին անգամ կողմերի միջև ավելի քան 400 կմ ձգվող շփման գծի երկայնքով կրակը շարունակվել է մի քանի ամբողջական օր:

Փորձագետների գնահատականներն առ այն, թե որքան լրացուցիչ զորք է ուղարկել Ռուսաստանը տարածաշրջան, հակասական են: Ամերիկյան վարչակազմի անանուն ներկայացուցիչը հայտարարել է՝ խոսքը մոտ 4000 մարդու մասին է: Սակայն, The New York Times-ի աղբյուրներն առաջարկում են ուշադրություն հրավիրել այլ բանի՝ ՌԴ նախագահ Վլադիմիր Պուտինի իրական մտադրությունների վրա:

«Ոմանք կարծում են, որ Կրեմլը մտադիր չէ ավելի հեռուն գնալ, մյուսները վախենում են, որ Դոնբասում հնարավոր ռազմական գործողությունը կարող է հանգեցնել լուրջ հետևանքների»,- նկատում է պարբերականը:

Վկայակոչելով Սպիտակ տան ներկայիս և նախկին պաշտոնյաների խոսքերը՝ NY Times-ը նշում է, որ լարվածությունը և ռուսական զորքերի կենտրոնացումը Կրեմլի համար կարող է նաև միջոց լինել՝ փորձելու հասկանալ, թե ինչքանով է ԱՄՆ նախագահ Ջո Բայդենը պատրաստակամ կատարել Ուկրաինային աջակցելու վերաբերյալ իր տված խոստումները:

«Հունվարին Ռուսաստանի նախագահի հետ զրույցի ընթացքում ամերիկացի առաջնորդը խոսել էր Ուկրաինայի ինքնիշխանության պահպանման կարևորության մասին: Եվ թվում է, որ սահմանային իրավիճակի սրման մեկնարկին ԱՄՆ-ն սկսում է դրան արձագանքել»,- գրում է թերթը՝ հիշեցնելով, որ անցած երկուշաբթի Ուկրաինայի նախագահի աշխատակազմի ղեկավարի և Ջո Բայդենի ազգային անվտանգության խորհրդականի միջև ծավալուն հեռախոսազրույց է տեղի ունեցել:

Միևնույն ժամանակ, New York Times-ն ուշադրություն է հրավիրում այն բանի վրա, որ հուլիսին ձեռք բերված ու վերջին շաբաթներին շփման գծում խախտված հրադադարի համաձայնագիրը ամենաերկարն էր վերջին տարիների ընթացքում: