Պետդումայի անդամը Ղրիմի պատճառով Կանադայի սահմանած պատժամիջոցները «հիմարություն» է անվանել

Ղրիմի շրջանից ՌԴ Պետդումայի պատգամավոր Միխայիլ Շերեմետը Ղրիմի պատճառով Կանադայի կողմից սահմանված պատժամիջոցները անվանել է «հիմարություն», քանի որ դրանք վնասում են ռուս-կանադական հարաբերություններին: Այս մասին գրում է «ՌԻԱ Նովոստի» գործակալությունը:

«Պատժամիջոցներն այլևս ոչ մի էմոցիա չեն առաջացնում: Մենք դրանց հանգիստ ենք նայում: Արևմուտքը պատժամիջոցներն օգտագործում է որպես ճնշման և պատերազմի գործիք ղրիմցիների և նրանց ժողովրդավարական ընտրության, ճշմարտության դեմ: Կանադայի պատժամիջոցները մեծ հիմարություն և անհեռատեսություն են: Դրանք անարդյունավետ և կործանարար են և վնասում են մեր ժողովուրդների հարաբերություններին»,-ասել է Շերեմետը գործակալության հետ զրույցում:

Նրա խոսքերով` Ռուսաստանի նկատմամբ Կանադայի ներկայիս անբարյացակամ քաղաքականությունը նրան պատիվ չի բերում:

«Մեր երկրի տնտեսությունը դարձել է ավելի կայուն և ավելի քիչ կախված արևմտյան երկրների տրամադրությունից, ուստի Կանադան չպետք է նախանձի Ռուսաստանի հաջողություններին և փորձի զսպել այն, այլ զբաղվի բարեկամական հարաբերությունների զարգացմամբ»,-ասել է պատգամավորը:

Ինչպես ավելի վաղ տեղեկացրել էինք, Կանադան ընդլայնել է Ռուսաստանի դեմ Ղրիմի հետ կապված պատժամիջոցները: