Ստրասբուրգի հայ քաղաքապետը ֆինանսավորում է թուրքերին, որ կառուցեն Եվրոպայի ամենամեծ մզկիթը (տեսանյութ)

Եվրոպայի քաղաքական մայրաքաղաքի՝ Ստրասբուրգի հայ ղեկավար Ժաննա Բարսեղյանը հիասթափեցրել է ոչ միայն Ֆրանսիայի հայ համայնքին, այլև երկրի քաղաքական դաշտին. մարտի 22-ին Ստրասբուրգի քաղաքային խորհուրդն առաջին քվեարկությամբ որոշել է իր բյուջեից 2,5 մլն եվրո տրամադրել Էրդողանին ենթակա «Միլլի Գյորուշ» թուրքական իսլամական ասոցացիային՝ Ստրասբուրգում Եվրոպայի ամենամեծ մզկիթը կառուցելու նպատակով:

Ֆրանսիայի ներքին գործերի նախարար Ժերար Դարմանենը մեղադրել է հայ քաղաքապետին, թե ինչպես է սատարում մի ասոցիացիայի, որն այս հունվարին հրաժարվել է ստորագրել Ֆրանսիայի կառավարության մշակած հայեցակարգը՝ ուղղված իսլամիստ ծայրահեղականների գործունեության դեմն առնելուն: Նա ասել է, որ ֆրանսիացիները պիտի հասկանան՝ Ֆրանսիայի տարածքում չի կարող հովանավորվել որևէ դավանանք: Բացի այդ՝ թրքամետ այդ կազմակերպությունը, հայեցակարգը չստորագրելով, չի պաշտպանել Ֆրանսիայի որդեգրած արժեքները:

Ժերար Դարմանենը նաև կոչ է արել Բա-Ռենի ոստիկանապետին, որ դիմի դատարան՝ Ստրասբուրգի քաղաքապետարանի այս որոշման օրինականության հարցը պարզելու համար: Իր հերթին ոստիկանապետ Շվալիեն մեղադրել է Ժաննա Բարսեղյանին՝ Ֆրանսիայի նախագահին սխալ տեղեկություն փոխանցելու համար.

«Տիկին քաղաքապետ, Դուք ճիշտ չեք նշել, թե ոստիկանապետը չի հայտնել իր մտահոգությունը մզկիթի ֆինանսավորման հարցում: Ես անձամբ մի քանի անգամ եմ այդ մասին Ձեզ ասել եմ: Հայցս վարչական դատարանում է արդեն»:

Մանրամասները՝ տեսանյութում: