Կինոփառատոն, լուսանկարների ցուցահանդես, համերգներ. Հայաստանում Ֆրանկոֆոնիայի մշակութային օրեր կանցկացվեն

Հայաստանում ֆրանսիական մշակույթի օրեր կանցկացվեն՝ նվիրված Ֆրանկոֆոնիայի միջազգային օրվան, որը նշվում է մարտի 20-ին: Հայաստանում Ֆրանսիայի արտակարգ եւ լիազոր դեսպան Ջոնաթան Լաքոթն առաջիկա միջոցառումներին նվիրված մամուլի ասուլիսի ժամանակ շնորհակալություն հայտնեց ՀՀ իշխանությանը՝ լեզվի եւ մշակույթի զարգացմանն աջակցելու համար: Դիվանագետը նշեց Հայաստանի ֆրանսիական համալսարանի, Անատոլ Ֆրանսի անվան ճեմարանի կարեւոր դերը, ֆրանսերենի խորացված ուսումնասիրության ընթացիկ ծրագրերը:

«Հայաստանում ֆրանսերեն կարելի է սովորել մանկապարտեզից մինչ համալսարան»,-նշեց դեսպանը՝ միաժամանակ հայտարարելով Ազնավուրի տանը Ազնավուր հիմնադրամի աջակցությամբ ֆրանսիական մշակույթի կենտրոնի բացման մասին: Դեսպանը հատուկ նշեց, որ Հայաստանը՝ լինելով իր ավանդական մշակութային արժեքներով եւ լեզվով երկիր, հոգու խորքում ընդունել է ֆրանսերենը եւ մշակույթը: Ֆրանսիան դա շատ բարձր է գնահատում:

Մշակութային օրերի շրջանակում Հայաստանում մեկ ամսվա ընթացքում կանցկացվեն տարբեր միջոցառումներ՝ մրցույթներ, լուսանկարների ցուցահանդես, համերգներ: Հիմնական իրադարձությունը կլինի Ֆրանկոֆոնիայի չորրորդ կինոփառատոնը: Այն տեղի կունենա ապրիլի 6-ից 13-ը «Մոսկվա» կինոթատրոնում: Փառատոնը կբացվի Ալեքս Միխալիկի «Էդմոն» (Ֆրանսիա, 2019) ֆիլմով, որը նվիրված է ֆրանսիացի բանաստեղծ եւ դրամատուրգ Էդմոն Ռոստանին: