Եվրահանձնաժողովի փոխնախագահը հայտարարել է, որ մարմարե քանդակները պատկանում են Պարթենոնին

Եվրահանձնաժողովի փոխնախագահ Մարգարիտիս Շինասը նշել է, որ մարմարե քանդակները, որոնք Մեծ Բրիտանիան հրաժարվել է վերադարձնել Հունաստանին, Պարթենոնինն են, հայտնում է Greek City Times լրատվականը։

«Մարմարները պատկանում են Պարթենոնին։ Այս դժվար ժամանակներում համաշխարհային մշակութային ժառանգությունը պետք է բարձրացնի մարդասիրության մակարդակը, ոչ թե բաժանի», – գրել է Շինասն իր թվիթերյան էջում։

Ինչպես ավելի վաղ տեղեկացրել էր Tert.am-ը, Մեծ Բրիտանիայի վարչապետ Բորիս Ջոնսոնը մերժել է Հունաստանի իշխանությունների` Պարթենոնի մարմարե քանդակները երկրին վերադարձնելու կոչը՝ պատճառաբանելով, որ 2500 տարվա պատմություն ունեցող մշակութային գանձերը «օրինականորեն պատկանում են Բրիտանական թանգարանի հոգաբարձուներին»։

«Ես հասկանում եմ այդ հարցի վերաբերյալ հույն ժողովրդի և վարչապետ Միցոտակիսի զգացմունքները», - ասել է Ջոնսոնը՝ վարչապետ դառնալուց ի վեր այդ հարցի վերաբերյալ իր առաջին հանրային մեկնաբանություններում և հավելել․ «Միացյալ Թագավորության կառավարությունը հստակ դիրքորոշում ունի քանդակների նկատմամբ, դրանք օրինական կերպով ձեռք են բերվել լորդ Էլգինի կողմից՝ համաձայն այդ ժամանակվա գործող օրենքների և դրանց ձեռքբերումից ի վեր օրինականորեն պատկանում են Բրիտանական թանգարանի հոգաբարձուներին»։

Արձագանքելով Բորիս Ջոնսոնի հայտարարությանը՝ Հունաստանի սպորտի և մշակույթի նախարար Լինա Մենդոնին ասել է․ «Մեծ Բրիտանիայի վարչապետ Բորիս Ջոնսոնի հայտարարության մանրազնին ուսումնասիրությունից պարզ է դառնում, որ երկրի իրավասու պետական մարմինները պատշաճ կերպով չեն տեղեկացրել նրան օսմացիների կողմից Հունաստանի օկուպացիայի մասին պատմական փաստերը, որոնք ցույց են տալիս, որ Լորդ Էլգինի կողմից Պարթենոնի քանդակները երբեք ձեռք չեն բերվել և, հետևաբար, Բրիտանական թանգարանը դրանք օրինական կերպով ձեռք չի բերել»։

«Հունաստանի համար Բրիտանական թանգարանը չունի քանդակների օրինական սեփականության իրավունք: Պարթենոնի արձանը, որպես ՅՈՒՆԵՍԿՕ-ի և արևմտյան քաղաքակրթության խորհրդանիշ, արտացոլում է համամարդկային արժեքները: Մենք բոլորս պարտավոր ենք աշխատել այս ուղղությամբ», - եզրափակել է Մենդոնին: