«Քավալայի գործը ցույց է տալիս Թուրքիայի դատական համակարգում առկա խնդիրները»․ ԵՄ նախարարների կոմիտեի խորհուրդը կոչ է արել անհապաղ ազատ արձակել Քավալային և Դեմիրթաշին

Թուրք գործարար, հասարակական գործիչ, բարերար Օսման Քավալայի գործի վերաբերյալ Մարդու իրավունքների եվրոպական դատարանի եզրակացությունները «բացահայտում են թուրքական դատական համակարգի անկախության և անկողմնակալության հետ կապված համատարած խնդիրները»։

Այս մասին հայտնում է Ahval-ը՝ հղում տալով ԵԽ նախարարների կոմիտեի խորհրդի կողմից հրապարակված հայտարարությանը:

Նախարարներն առանձին հայտարարության մեջ նշել են, որ Թուրքիան՝ ընդդիմադիր գործիչ Սելահաթթին Դեմիրթաշի գործի վերաբերյալ գործողությունների ծրագիր դեռևս չի ներկայացրել, և կրկնել են ՄԻԵԴ-ի գնահատականն այն մասին, որ քուրդ քաղաքական գործչի կալանքը բազմակարծությունը խեղդելու և քաղաքական բանավեճը սահմանափակելու նպատակ ունի:

Որպես Թուրքիայի երկրորդ ամենամեծ ընդդիմադիր կառույցի (քրդամետ «Ժողովուրդների դեմոկրատական կուսակցություն») նախկին առաջնորդ, Դեմիրթաշը կալանքի տակ գտնվելու ընթացքում մասնակցել է 2018 թվականի նախագահական ընտրություններին: 2016 թվականի նոյեմբերին ձերբակալվելուց հետո քուրդ քաղաքական գործիչը չի կարողացել կատարել որպես խորհրդարանի անդամի իր պարտականությունները, ինչը ՄԻԵԴ-ը գնահատել է, որպես ազատ ընտրությունների իրավունքի խախտում:

Նախարարների կոմիտեի խորհուրդը կոչ է արել անհապաղ ազատ արձակել Քավալային և Դեմիրթաշին՝ ևս մեկ անգամ հաստատելով բարձրագույն դատարանի գնահատականն այն մասին, որ երկու գործիչների կալանավորումները տեղի են ունեցել ապացույցների բացակայության պայմաններում։