Թուրքիայում 2016-ի ձախողված հեղաշրջման փորձից հետո ավելացել են քրիստոնյաների՝ հատկապես բողոքականների նկատմամբ ճնշումները. The Times

Թուրքիայում հեղաշրջման ձախողված փորձից և Բողոքական եկեղեցու ամերիկացի հոգևոր հովիվ Էնդրյու Բրանսոնի ձերբակալումից հետո Թուրքիայում ավելացել են ճնշումները տեղի մոտ 10 հազար բողոքականների նկատմամբ, հայտնում է The Times–ը, որը զրուցել է թուրքական բանտում երկու տարի անցկացրած Բրանսոնի հետ:

Նրանք գտնվում են ազգայականության հողի վրա բռնության և Թուրքիայից արտաքսվելու սպառնալիքների ներքո:

«Թուրքիայում քրիստոնյաների վիճակը սկսել է վատթարանալ, քանի որ նախագահ Ռեջեփ Թայիփ Էրդողանը հրաժարվել է իր եվրոպական հավակնություններից՝ իր հռետորաբանության և քաղաքականության մեջ ավելի կոշտ իսլամիստ դառնալով», – նշել է հոգևոր սպասավորը: Սակայն հատկապես բողոքականները սկսել են խնդիրների բախվել այն օրվանից, ինչ Վաշինգտոնն ու Անկարան վիճաբանության մեջ են մտել հոգևոր հովիվ Բրանսոնի ազատ արձակման հարցի շուրջ։ Հոգևոր հովիվը երկու տարի է անցկացրել թուրքական բանտում՝ նախքան ազատ արձակվելը։

Թուրքիայի իշխանությունները 2016 թվականի հուլիսին տեղի ունեցած հեղաշրջման ձախողված փորձից հետո, համընդհանուր ճնշման շրջանակներում, ձերբակալել են նաև հոգևոր հովվին:

Իզմիրի Հարության եկեղեցու հովիվը հազարավոր այն մարդկանց թվում էր, որոնք բերման էին ենթարկվել ոստիկանության բաժանմունքներ։ Բերման ենթարկվածների թվում են եղել լրագրողներ, ակտիվիստներ և Թուրքիայի նախագահի հակառակորդներ: Բրանսոնը մեղադրվել է լրտեսության, «Քուրդիստանի աշխատավորական կուսակցության» և ԱՄՆ-ում բնակվող հոգևորական Ֆեթուլլահ Գյուլենի հետ կապեր ունենալու համար։ Վերջինիս Անկարան մեղադրում է հեղաշրջման ձախողված փորձը կազմակերպելու համար:

Times-ը զրուցել է բողոքականների հետ, որոնք պատմել են թե ինչպես են իրենց վտարել Թուրքիայից:

«Հենս և Ռենատա Յուրգեններն, որոնք Էգեյան ծովի ափին գտնվող Մուղլա նահանգում հյուրատուն և ֆերմա են ունեցել և զբոսաշրջային արշավներ են կազմակերպել դեպի տարածքի քրիստոնեական հուշարձաններ, հասկացել են, որ պետք է լքեն այն երկիրը, որը 22 տարի շարունակ տուն են անվանել», – գրել է Times–ը և նշել, որ թուրք մուսուլման հարևաններից մեկն է զույգին բացատրել, որ պետք է հեռանան երկրից։

38–ամյա Լուտֆու Քերեմ Սուբասիգուլերը, որը քրիստոնեություն է ընդունել 10 տարի ամերիկուհու հետ ամուսնացած լինելուց հետո, նշել է, որ Թուրքիայում իր կնոջ կացության թույլտվության ժամկետն ավարտվել է և զույգը ստիպված է եղել երեք երեխաների հետ Միացյալ Նահանգներ մեկնել։

«Մենք փորձեցինք հաստատվել Կիպրոսում, որպեսզի մոտ լինենք կնոջս ընտանիքին, սակայն մեզ մերժեցին», – ասել է Սուբասիգուլերը և հավելել, որ այս պահին Թուրքիայի արդարադատության համակարգը չի գործում և հենց այդ պատճառով էլ նրանց Թուրքիա վերադարձն անհնար է։

Զույգի փաստաբան Քեմալ Չենգիզն ասել է, որ իրեն թույլ չեն տվել ժանոթանալ նրանց փաստաթղթերի փաթեթին և շեշտել, որ սա վերջին տարիներին առկա աննախադեպ զարգացում է Թուրքիայում։ Նա նշել, որ նման դեպքեր եղել են 1990–ական թվականներին։