Ռուսաստանում ձերբակալվել է ամենահեղինակավոր գողերից մեկը

Մոսկվայի շրջանում քրեական հետախուզության վարչության աշխատակիցները ձերբակալել են 55-ամյա «օրենքով գող» Սերգեյ Լեւաշովին, որը քրեական շրջանակներում հայտնի է որպես Ռամս: Այս մասին հինգշաբթի, մարտի 4-ին, հայտնել է «Փրայմ Քրայմ» լրատվական գործակալությունը:

Օպերատիվ աշխատակիցները Լեւաշովին կասկածում են խոշոր չափի թմրանյութեր վաճառելու փորձի մեջ՝ անձնական խուզարկության ժամանակ քրեական հեղինակությունից առգրավվել է պայուսակ՝ չորս փաթեթ հերոինով, որոնց քաշը մոտ յոթ գրամ է եղել: Եթե կալանավորի մեղավորությունն ապացուցվի, նրան սպառնում է մինչեւ քսան տարվա ազատազրկում:

Ինչպես նշում է լրատվամիջոցը, Տյումենի շրջանի բնակիչ Լեւաշովը մայրաքաղաքային տարածաշրջանում ամենահեղինակավոր սլավոնական գողերից մեկն է՝ Պետրիկի եւ Շիշկանի հետ միասին: 1993 թվականին թագադրվել է վրացի ազդեցիկ «օրենքով գողեր» Ջեմալ Միքելաձեի (Արսեն) եւ Ռոբերտ Կալանդաձեի (Ռոբերտ) կողմից։

Իր վերջին դատապարտումը՝ զենքի եւ կողոպուտի համար, Լեւաշովը ստացել է դեռ ԽՍՀՄ օրոք, եւ այդ ժամանակվանից երբեք չի ենթարկվել քրեական պատասխանատվության: ԶԼՄ-ի տվյալներով՝ նա 2021 թվականի սկզբից դարձել է երկրորդ «օրենքով գողը», որը մերձմոսկովյան օպերատիվ աշխատակիցների կողմից կալանավորվել է քրեական հիերարխիայում բարձր դիրք զբաղեցնելու հետ կապ չունեցող հոդվածով (ՌԴ ՔՕ 210.1):

Առաջինը վրացի «օրենքով գող» Դավիթ Պանչվիձեն էր (Գեորգի Կիպիանի), որին հունվարին Խիմկիում ձերբակալել էին՝ հերոինի հետ կապված: Նա անցնում է խոշոր չափի թմրանյութ պահելու գործով (ՌԴ ՔՕ 228 հոդվածի 2-րդ մաս) եւ Խիմկիի դատարանի որոշմամբ ձերբակալվել է երկու ամսով: Կիպիանիին սպառնում է 3-10 տարվա ազատազրկում: