Փաշինյանի և նրա թիմի «խերը». «կաշին քերթող» 650.000 դրամի ՀԴՄ-մահակ քաղաքացիների գլխին. «168 ժամ»

«168 ժամ» թերթը գրում է.

«Ինչպես և օրեր առաջ հրապարակմամբ մենք կանխատեսել էինք, գործող իշխանության գրպանային Սահմանադրական դատարանը (ՍԴ) փետրվարի 19-ին Սահմանադրությանը համապատասխանող ճանաչեց Հարկային օրենսգրքի դրույթները, որով սահմանադրական կնիք դրեց Փաշինյանի կառավարության՝ որպես բարեփոխում հրամցվող, սակայն իրականության մեջ՝ ՀԴՄ կտրոնների տեռորիստական քաղաքականության վրա։ Ուստի, բոլոր այն քաղաքացիները, որոնք քվեարկել են օրվա իշխանությունների օգտին և զբաղվում են սննդի ոլորտի բիզնեսով, թող չբողոքեն ու հլու-հնազանդ վճարեն 650.000 ՀԴՄ կտրոն չխփելու համար։

Անշուշտ, այդ որոշման համար Փաշինյանը կշոյի ՍԴ-ում յուր վստահված անձ Վահե Գրիգորյանին և կատարածու Արման Դիլանյանին։ Այս զույգն իր հանձնարարությունը, թեկուզ մեծագույն դժվարությամբ (անգամ նախապես նշանակված փետրվարի 16-ի նիստը հետաձգելով, գործով զեկուցող փոխելով), բայց կատարել է՝ պարտադրված ՍԴ որոշումն ընդունվել է բավարար նվազագույն ձայներով։

ՍԴ 5 հլու դատավոր կողմ են քվեարկել, իսկ 4 դատավոր, հարգելով իրենց առաքելությունը, մասնագիտական գիտելիքները՝ դրան դեմ են քվեարկել։ Հինգ դեմ քվեարկած դատավորներից առնվազն երկուսը մինչև վերջին պահը տատանվել են կողմ, թե դեմ քվեարկելու հարցում։

Մեզ չհաջողվեց պարզել կողմ և դեմ քվեարկածների անունները, սակայն հայտնի դարձավ, որ դեմ քվեարկածներից մի քանիսը հատուկ կարծիք են ներկայացնելու, ինչը, ասում են, աննախադեպ է մեկ որոշման կապակցությամբ, բայց շատ խոսուն վկայություն՝ ՍԴ որոշման՝ Կառավարության շենքից թելադրված լինելու մասին։

Ուշագրավ է այն, որ հիմնական զեկուցողը ևս ներկայացրել էր այդ աննախադեպ ու անհամաչափ ու խտրական տուգանքը հակասահմանադրական ճանաչելու որոշման նախագիծ, սակայն ՍԴ նախագահի պաշտոնը զբաղեցնող անձը սկզբում հորդորել էր զեկուցողին երկու նախագիծ ներկայացնել, որոնցից մեկով այն ճանաչվում էր սահմանադրական, մյուսով՝ հակասահմանադրական, բնականաբար, սահմանադրական ճանաչող նախագծի հեղինակը զեկուցողը չէր, այլ հենց ՍԴ նախագահի պաշտոնը զբաղեցնողը։ Ավելին` այս գործով խորհրդակցական սենյակում հիմնական զեկուցող է փոխվում՝ Խաչատրյանին փոխարինում է Վաղարշյանը։

Հիշյալ որոշումը հրապարակված է ՍԴ կայքում։ Արդեն բազմաթիվ տնտեսվարողներից, նրանց իրավաբան ներկայացուցիչներից ստանում ենք ահազանգեր, ովքեր զարմացած և զայրացած են նման մակարդակի որոշումից, անարդարությունից, ցածր որակից, իրական կյանքից հեռու տեսական դեգերումներից, անգամ այն որոշում անվանելը զավեշտ են համարում, բնութագրում են՝ որպես նիկոլական շտամպով կատարողական թերթիկ, որով շարունակվելու է տնտեսվարողներին հարկադրել վճարել աննախադեպ ու անհամաչափ տուգանքներ, մնալ ոչնչացող տնտեսության փլատակների տակ։

Այնպիսի տպավորություն է, ասես այն գրված է որևէ մասնագիտական կրթություն չունեցող, «մեծն սահմանադրագետ» Վահագն Հովակիմյանի ձեռամբ…

Նախորդ հրապարակման մեջ նշել էինք նաև, որ ՍԴ-ն նույն հարցով առանձին, ապրիլի 27-ին, քննելու է նաև Մարդու իրավունքների պաշտպանի (ՄԻՊ) դիմումը, և, որ փետրվարի որոշումը կայացվում է այդ դիմումի ելքը կանխորոշելու համար։

Մենք հետևողական կլինենք և կներկայացնենք նաև դրա ընթացքը։

Մեզ հայտնի դարձավ նաև, որ նույնաբովանդակ դիմում ՍԴ-ն ստացած է եղել դեռևս 2019 թվականին, և 2020 թվականի սկզբներին, Հարկային օրենսգրքի ՀԴՄ-ների տուգանքների հետ կապված գրեթե բոլոր հոդվածները հակասահմանադրական ճանաչող որոշում է հավանության արժանացած եղել ՍԴ-ի կողմից, սակայն վերջին պահին ՄԻՊ-ը հետ է վերցրել իր դիմումը՝ մատնանշելով, որ կառավարության հետ ունի պայմանավորվածություններ, որ նրանք համապատասխան շտկումներ կանեն։ Սակայն, ինչպես գրեթե միշտ, կառավարությունը խաբել է, և Արման Թաթոյանը նույնաբովանդակ նոր դիմում է ներկայացրել։

Մինչև կազմաքանդվելը ՍԴ-ն իր որոշումները կայացնում էր հանուն Հայաստանի Հանրապետության։ Իսկ այսօր կարող ենք բազմաթիվ օրինակներով այլևս փաստել՝ ազգակործան հեղափոխության ծնունդ ՍԴ-ի հլու կազմը որոշումները կայացնում է հանուն փաշինյանական Հայաստանի, կամ, որ նույնն է՝ հանուն Հայաստանի կործանման»,-գրում է թերթը:

Նյութն ամբողջությամբ կարդացեք թերթի այսօրվա համարում: