«Պատմական վայրէջք»․ Բայդենը ՆԱՍԱ-ին շնորհավորել է Perseverance-ի՝ Կարմիր մոլորակի մակերևույթին հաջող վայրէջքի կապակցությամբ

ԱՄՆ նախագահ Ջո Բայդենը ՆԱՍԱ-ին շնորհավորել է Perseverance մարսագնացի՝ Կարմիր մոլորակի մակերևույթին հաջող վայրէջքի կապակցությամբ: Այս մասին ճեպազրույցի ժամանակ հայտնել է ՆԱՍԱ-ի ղեկավարի պաշտոնակատար Սթիվ Յուրչիկը, գրում է space.com-ը։

«Վայրէջքից մոտ մեկ ժամ անց ինձ զանգահարեց ԱՄՆ նախագահը և ասաց․ «Շնորհավորում եմ, եղբայր»»,- ասել է նա։

Յուրչիկի խոսքով՝ Բայդենը նշել է, որ «հպարտանում է ՆԱՍԱ-ի հաջողություններով և շնորհավորում ամբողջ թիմին»:

«Շնորհավորում եմ ՆԱՍԱ-ին և բոլոր նրանց, ում ծանր աշխատանքը հնարավոր դարձրեց Perseverance-ի պատմական վայրէջքը»,- վայրէջքից մոտ երկու ժամ անց Twitter-ում գրել է Բայդենը` կից տեղադրելով լուսանկար, որտեղ հետևում է վայրէջքի պահին։

Ավելի վաղ հաղորդվել էր, որ ՆԱՍԱ-ի Perseverance մարսագնացը 6 ամիս առաջ Երկիր մոլորակից մեկնարկելուց հետո վայրէջք է կատարել Կարմիր մոլորակի մակերևույթին։

Մարսագնացը վայրէջք կատարելուց անմիջապես հետո Երկիր է ուղարկել Մարսի երևացող հատվածի լուսանկարները:

Սարքը մինչև մոլորակի մակերևույթին վայրէջք կատարելը շուրջ 300 միլիոն մղոն ճանապարհ է անցել:

Մարսագնացի առջև մի շարք առաջադրանքներ են դրված՝ պետք է Մարսի վրա կյանքի առկայության հետքեր փնտրվեն, Կարմիր մոլորակից ձայնային հաղորդագրություններ ուղարվեն Երկիր, Ջեզզոյի խառնարանի ուսումնասիրություն, որի տեղում 3.9 միլիարդ տարի առաջ լիճ է գոյություն ունեցել: Մարսագնացը պետք է նաև նույն վայրում միկրոբրածոների որոնողական աշխատանքներ կատարի:

Մարսագնացին նաև թեթև ուղղաթիռ է կցված, որը պետք է փորձնական թռիչքներ իրականացնի մոլորակի վրա: