Երկրաշարժ՝ Իրանում

Սեյսմոլոգները Իրանի կենտրոնական մասում 5,4 բալ ուժգնությամբ երկրաշարժ են գրանցել: Այս մասին հայտարարել է Եվրոպական-միջերկրածովյան սեյսմոլոգիական կենտրոնը, հաղորդում է ՏԱՍՍ-ը:

Ստորգետնյա ցնցումների էպիկենտրոնը գտնվել է Շեխրե-Կորդ քաղաքից մոտ 149 կմ հարավ-արեւելք, որտեղ ապրում է 129 000 մարդ: Օջախը եղել է 10 կմ խորությամբ: Tasnim-ը հայտնում է, որ երկրաշարժի ուժգնությունը կազմել է 5,6 բալ:

Ինչպես հայտնում է Tasnim-ը, հղում կատարելով արտակարգ իրավիճակների ծառայություններին, երկրաշարժի հետեւանքով առնվազն 10 մարդ է տուժել: Գործակալության տվյալներով՝ Յասուջ եւ Սիսեխտ քաղաքներում ավերածություններ կան, տուժած տարածքներում որոշ ճանապարհներ արգելափակվել են, ջրի եւ էլեկտրամատակարարման խափանումներ կան: Դեպքի վայր են ուղարկվել շտապօգնության մեքենաներ: