Եթե Փաշինյանը և նրա թիմը չեն գիտակցում, թե ինչ աղետի են բերել ազգին և պետությանը, եթե կարողանում են գիշերները հանգիստ քնել, ապա թող վայելեն չեղած պետության մեջ իրենց պաշտոնները. «Առավոտ»

«Առավոտ» թերթը գրում է.

«Կիրակի օրը տեղի է ունեցել Փաշինյանի և «Իմ քայլի» հանդիպումը, որի արդյունքում «արձանագրվել է, որ արտահերթ խորհրդարանական ընտրություններ անցկացնելու մասին վարչապետի առաջարկը դրական արձագանք չի ստացել խորհրդարանական ընդդիմության կողմից, հասարակության լայն շերտերի շրջանում չկա արտահերթ ընտրությունների պահանջ»:

Քանի որ ակնհայտ է, որ «Իմ քայլն» ընդունակ չէ որևէ ինքնուրույն որոշման, հասկանալի է, որ այդ «արձանագրումն» արել է հենց վարչապետը, իսկ պատգամավորները, բնականաբար, ուրախացել են դրանից, որովհետև նման զարգացումն ապահովագրում է իրենց մանդատները ևս 3 տարով: Այսինքն՝ Փաշինյանը հավաքել է իր «ստորադասներին» և հայտարարել է, որ որոշել է ոչ մի արտահերթ ընտրություններ չանցկացնել, իսկ վերջիններս ոգևորված ծափահարել են՝ «հա, իհարկե, շատ իմաստուն որոշում է, հեսա մենք դրա համար 100 հատ հիմնավորում կգտնենք»:

Հավանաբար, կբացատրեն, որ բոլոր խոսակցություններն այն մասին, որ իրենք կառչած չեն իրենց աթոռներից, իրականում կատակ էին: Գուցե դա տարօրինակ հնչի, բայց ես չէի ցանկանա, որ այս տարի արտահերթ ընտրություններ կայանան, եթե դրանք անցկացնելու է ներկայիս իշխանությունը, որովհետև այդ դեպքում դրանց լեգիտիմությունն իմ մեջ մեծ կասկածներ կառաջացներ:

Բացի այդ, ընտրություններն իմաստ կունենային այն դեպքում, եթե քաղաքական ասպարեզում լիներ որևէ ուժ, որը ելք կառաջարկեր ներկայիս ողբալի վիճակից, ինչը ես, ճիշտն ասած, չեմ տեսնում: Եվ վերջապես, զուտ տեսականորեն՝ ընտրությունները պետք է նպաստեն երկրի կայունությանը, հասարակության միասնականացմանը: Բայց այսօրվա մթնոլորտում դա բացառված է՝ ընտրարշավի ժամանակ լարված կրքերը կարող են բերել նոր ցնցումների:

Փաշինյանի՝ որպես պետության ղեկավարի, գործունեությունը մշտապես ուղղված է սկանդալին, հակադրությանը, պառակտմանը, և ես չեմ պատկերացնում, թե ինչպես է դա հնարավոր հաղթահարել: Եթե վարչապետը և նրա թիմը չեն գիտակցում, թե ինչ աղետի են բերել ազգին և պետությանը, եթե նրանք կարողանում են գիշերները հանգիստ քնել և երազներում չեն տեսնում հազարավոր մարդկանց արյունը, ապա, ինչ ասեմ՝ թող վայելեն չեղած պետության մեջ իրենց պաշտոններն ու մանդատները»,-գրում է թերթը:

Նյութն ամբողջությամբ կարդացեք թերթի այսօրվա համարում: