Ուրախությունը վերածվեց մղձավանջի. ինչպես է Մեսսիի հետ հանդիպումն աֆղանստանցի փոքրիկի կյանքը դժոխքի վերածել. Al Jazeera

2016-ի հունվարին Մուրթազա Ահմադին մեծ ճանաչում էր ձեռք բերել արգենտինացի ֆուտբոլիստ Լիոնել Մեսսիի հետ հանդիպումից հետո: Այնուամենայնիվ, ֆուտբոլային աստղի հետ հանդիպումը ավելի շատ անեծք է դարձել փոքրիկի ու նրա ընտանիքի համար, տղայի կյանքը շուտով վերածվել է դժոխքի, գրում է Al Jazeera-ն:

Լրատվամիջոցը նշում է՝ աֆղանստանցի տղան միջազգային ճանաչում էր ձեռք բերել 5 տարեկանում: Այդ ժամանակ նրա ավագ եղբայրը Facebook սոցիալական ցանցի իր էջում հրապարակել էր Մուրթազայի լուսանկարը, որում տղան կրում էր գծավոր պոլիէթիլենային տոպրակից պատրաստված ֆուտբոլային շապիկ, որի վրա մակագրված էր Մեսսիի անունն ու ֆուտբոլային համարը:

Օրերս Bleacher Report բրիտանական հրատարակությունը դարձյալ անդրադարձել էր Մուրթազա Ահմադիի պատմությանը, մանրամասնելով, որ տղայի կյանքը դժոխքի է վերածվել այն բանից հետո, երբ Մեսսին տեսել է երեխայի լուսանկարը և «Բարսելոնա» և «Ալ-Ահլի» ֆուտբոլային թիմերի միջև ընկերական խաղից հետո հանդիպել է նրա հետ Կատարի մայրաքաղաք Դոհայում:

«Նրանք չէին էլ կարող ենթադրել, որ անվանի ֆուտբոլիստի հետ հանդիպումից հետո իրենց ընտանիքին կարող էին սպառնալ հաշվեհարդարով: Ավելին, Մուրթազայի ընտանիքն անգամ վախեցել է, որ տղային կարող են առևանգել, և այդ պատճառով ստիպված են եղել նրան թաքցնել Քաբուլում»,- շեշտում է լրատվամիջոցն ու մեջբերում Մուրթազայի եղբոր խոսքերն այն մասին, որ «Մեսսին ոչնչացրել է իրենց կյանքը»:

Գործակալությունը հայտնում է՝ անվանի ֆուտբոլիստը ժամանակ առ ժամանակ աղքատ ընտանիքին ծանրոցներ է ուղարկել, որոնցում ֆինանսական օգնության փոխարեն միայն ֆուտբոլի գնդակներ և Արգենտինայի ազգային հավաքականի մարզաշապիկներ են եղել:

Հենց այստեղից էլ տղայի հոր Արեֆ Ահմադի խոսքով՝ սկսել են իրենց խնդիրները, քանի որ մարդիկ հավատացել են, որ Մեսսին իրենց մեծ գումար է ուղարկել: Ընտանիքին սկսել են հետապնդել, տեղական «հեղինակությունները», որոնք ցանկացել են գումար հափշտակել կամ առևանգել երեխային հետագայում փրկագին պահանջելու համար, սկսել են այցելել նրանց տուն: Բացի այդ, ընտանիքը սպառնալիքներով լի մի շարք նամակներ է ստացել: Այս ամենի պատճառով տղայի հայրը ստիպված է եղել դիմել օտարերկրյա դեսպանատներ քաղաքական ապաստան ստանալու խնդրանքով, բայց բոլորից մերժում է ստացել:

«Մենք կարծում էինք, որ Մեսսին կանի նույնը, ինչ Ռոնալդուն (պորտուգալացի ֆուտբոլիստ), այսիքն՝ երեխային կօգնի ֆինանսապես: Մենք մեկնեցինք Դոհա, որպեսզի Մեսսին կարողանա ինչ-որ բան անել նրա համար, բայց նա ոչինչ չարեց Մուրթազայի համար», - հավելել է նա:

Պարբերականը նշում է՝ «Բարսելոնա» - «Ալ-Ահլի» ընկերական խաղից հետո Մուրթազան վերադարձել է Աֆղանստան, որտեղ էլ նրա կյանքը դժոխքի էր վերածվել: Մարդիկ հավատացած են, որ Մեսսին տղային ֆինանսապես աջակցում է, ու հենց այս պատճառով էլ նրանք սկսել են սպառնալ վերջինիս: Ստեղծված իրավիճակի պատճառով տղան անգամ դադարել է դպրոց հաճախել:

«Մուրթազան չի կարողացել տնից դուրս գալ կամ անել այն, ինչ սիրում էր, այն է՝ ֆուտբոլ խաղալ: Ի վերջո, ընտանիքը նրան ուղարկել է Քաբուլ՝ իր հորեղբոր մոտ, որտեղ նրան ոչ ոք չի ճանաչում: Բայց Աֆղանստանի մայրաքաղաքում տեղի ունեցած մի շարք ահաբեկչություններից հետո տղան ստիպված է եղել վերադառնալ իր ընտանիքի մոտ»,- մանրամասնում է արաբական լրատվամիջոցը:

Չնայած բոլոր տառապանքներին՝ տղան շարունակում է հավատարիմ մնալ իր սիրելի աստղին: Նա հաստատել է, որ, չնայած իր հետ տեղի ունեցած ամեն ինչին, ինքը չի զղջում ոչնչի համար:

«Ես կրկին կկրեմ մարզաշապիկը, քանի որ պաշտում եմ Մեսսիին», - ասել է նա: